گریٹر اسرائیل کا منصوبہ عرب دنیا کے لیے سنگین خطرہ:خلیجی تعاون کونسل کے سیکرٹری جنرل

گریٹر اسرائیل کا منصوبہ عرب دنیا کے لیے سنگین خطرہ:خلیجی تعاون کونسل کے سیکرٹری جنرل

 خلیجی تعاون کونسل (GCC) کے سیکرٹری جنرل جاسم البدیوی نے کہا ہے کہ اسرائیل کا نام نہاد "گریٹر اسرائیل” منصوبہ عرب دنیا کی قومی سلامتی کے لیے ایک بڑا خطرہ اور بین الاقوامی قوانین کی کھلی خلاف ورزی ہے۔

کویتی اخبار القبس کو دیے گئے ایک انٹرویو میں البدیوی نے کہا کہ خلیجی ممالک ہر اس توسیع پسندانہ سوچ کو مسترد کرتے ہیں جو عرب ریاستوں کی خودمختاری کو نقصان پہنچائے اور یہ رجحانات خطے کے امن و استحکام کے لیے سنگین نتائج پیدا کر سکتے ہیں۔

انہوں نے واضح کیا کہ خلیجی ممالک فلسطینی عوام کے ساتھ کھڑے ہیں اور اسرائیلی جارحیت، غزہ پر حملوں اور نہتے شہریوں خصوصاً خواتین و بچوں کے قتل عام کو سختی سے مسترد کرتے ہیں۔ ان کے مطابق محاصرہ اور بھوک سے عوام کو سزا دینا جنگی جرائم اور انسانیت کے خلاف سنگین جرم ہے۔

جاسم البدیوی نے فوری جنگ بندی، غزہ کا محاصرہ ختم کرنے اور امدادی سامان کی بلا رکاوٹ فراہمی کا مطالبہ کیا۔ ساتھ ہی انہوں نے غزہ پر اسرائیلی جارحیت روکنے، انسانی امداد پہنچانے اور جنگ بندی کے لیے ثالثی کوششوں میں عرب اور خلیجی ممالک کی سفارتی کاوشوں کو سراہا۔

انہوں نے اسرائیل کی جانب سے شام کی خودمختاری کی خلاف ورزیوں اور فوجی حملوں کی مذمت کرتے ہوئے کہا کہ یہ اقدامات ناقابل قبول ہیں۔ ساتھ ہی خلیجی تعاون کونسل کے مستقل موقف کو دہراتے ہوئے انہوں نے لبنان کی خودمختاری، سلامتی اور ارضی سالمیت کی مکمل حمایت کا اعادہ کیا اور اسرائیلی جارحیت کو سختی سے مسترد کر دیا۔