گرین لینڈ کا ٹرمپ کو منہ توڑ جواب

سچ خبریں:گرین لینڈ کے وزیر اعظم نے امریکی صدر ڈونلڈ ٹرمپ کی جانب سے اس جزیرے پر ہسپتالی جہاز بھیجنے کی پیشکش کو مسترد کرتے ہوئے کہا ہے کہ انہیں کسی بیرونی امداد کی ضرورت نہیں ہے۔

انہوں نے مزید کہا کہ گرین لینڈ میں مفت سرکاری صحت کی سہولت موجود ہے، جبکہ امریکہ میں ایسا نہیں ہے اور وہاں علاج کی ادائیگی کرنی پڑتی ہے۔ انہوں نے کہا کہ ہم امریکہ سمیت سب کے ساتھ بات چیت اور تعاون کے لیے ہمیشہ تیار ہیں، لیکن سوشل میڈیا پر بے بنیاد بیانات دینے کی بجائے ہم سے براہ راست رابطہ کریں۔

اس سے قبل ڈنمارک کے وزیر دفاع نے بھی امریکی صدر کے اس اعلان کے ردعمل میں کہا تھا کہ گرین لینڈ کے صحت کے نظام کو کسی بیرونی امداد کی ضرورت نہیں ہے۔ ان کا کہنا تھا کہ گرین لینڈ کے باشندوں کو تمام ضروری طبی سہولیات خود گرین لینڈ میں میسر ہیں اور وہ ڈنمارک میں بھی خصوصی علاج حاصل کر سکتے ہیں۔

امریکی صدر ڈونلڈ ٹرمپ نے دعویٰ کیا تھا کہ وہ گرین لینڈ کے مریضوں کے علاج کے لیے ایک  خارق العادہ ہسپتالی جہاز بھیجیں گے، کیونکہ ان کے مطابق وہاں کے باشندوں کو مناسب طبی سہولیات نہیں مل رہی ہیں۔

گرین لینڈ، جو دنیا کا سب سے بڑا جزیرہ ہے، معدنیات سے مالا مال ہے اور قطب شمالی میں اس کی تزویراتی اہمیت ہے۔ یہ ایک خودمختار علاقہ ہے، لیکن ڈنمارک کی بادشاہت کا حصہ ہے۔

ٹرمپ پہلے بھی گرین لینڈ کی خریداری کی خواہش کا اظہار کر چکے ہیں اور اسے امریکی قومی سلامتی کے لیے اہم قرار دے چکے ہیں۔ انہوں نے اسے حاصل کرنے کے لیے طاقت کے استعمال کا بھی اشارہ دیا تھا، جس سے واشنگٹن اور نیٹو اتحادیوں کے درمیان تناؤ بڑھ گیا تھا۔