کرزئی افغانستان سے باہر کیا کر رہے ہیں؟

?️ 20 دسمبر 2022

سچ خبریں:افغانستان کے سابق صدر حامد کرزئی نے بیرون ملک بعض افغان حکام اور سیاسی شخصیات کے ساتھ ملاقات کی ہے۔

افغانستان کے سابق صدر حامد کرزئی جن کے بارے میں کہا جاتا ہے کہ وہ علاج کے لیے جرمنی گئے تھے، نے اس ملک کے بعض سابق حکام اور سیاسی شخصیات سے الگ الگ ملاقاتیں کیں،سب سے پہلے انہوں نے جرمنی میں افغانستان کے سابق وزیر انصاف فضل احمد معنوی سے ملاقات کی اور مخلتف موضوعات پر بات کی، یاد رہے کہ معنوی اس وقت طالبان کی عبوری حکومت کے مخالفین میں سے ہیں اور افغانستان قومی مزاحمتی محاذ نامی کونسل کے ایک معروف رکن ہیں۔

کہا جاتا ہے کہ کرزئی سے ملاقات میں معنوی نے احمد مسعود کی نمائندگی کی،افغان ذرائع کے مطابق کرزئی کے دورے کی اگلی منزل ترکی ہے جہاں وہ اس ملک میں مقیم کئی افغان جہادی رہنماؤں اور سیاسی شخصیات سے ملاقاتیں اور بات چیت کرنے والے ہیں، کرزئی کا ترکی کا دورہ تین روزہ ہے جس میں عبدالرسول سیاف،کریم خلیلی،عبدالرشید دوستم اور محمد محقق سے ملاقات ان کے منصوبوں میں سے ایک ہے۔

ذرائع کا مزید کہنا ہے کہ صلاح الدین ربانی بھی ان لوگوں میں شامل ہیں جن سے کرزئی بات چیت کرنے والے ہیں،ان ملاقاتوں سے پہلے،کرزئی نے کابل چھوڑنے کے بعد اپنی پہلی منزل متحدہ عرب امارات میں افغانستان کے لیے امریکی نمائندہ خصوصی ٹام ویسٹ سے ملاقات کی اور بات چیت کی، یاد رہے کہ کرزئی، جنہوں نے طالبان کے دوبارہ اقتدار میں آنے کے بعد افغانستان نہیں چھوڑا، حال ہی میں اعلان کیا کہ افغانستان سے باہر جانے کے لیے ان پر عائد سفری پابندی ہٹا دی گئی ہے۔