چین کا امریکا سے دفاعی بل کی چین مخالف شقوں پر عمل نہ کرنے کا مطالبہ

چین کا امریکا سے دفاعی بل کی چین مخالف شقوں پر عمل نہ کرنے کا مطالبہ

چین نے امریکا سے مطالبہ کیا ہے کہ وہ اپنے دفاعی بل میں شامل چین مخالف شقوں پر عمل درآمد نہ کرے۔ چینی وزارت خارجہ نے جمعے کے روز کہا کہ بیجنگ امریکا کے اس قانون سے سخت نالاں ہے اور اس کی بھرپور مخالفت کرتا ہے، جبکہ اس حوالے سے واشنگٹن کو متعدد بار اپنے اعتراضات سے آگاہ بھی کیا جا چکا ہے۔

وزارت خارجہ کے ترجمان گوؤ جیاکن نے ایک پریس بریفنگ میں کہا کہ امریکا کا نیشنل ڈیفنس آتھورائزیشن ایکٹ 2026 چین کے خطرے کو بڑھا چڑھا کر پیش کرتا ہے اور اس سے چین کی خودمختاری، سلامتی اور ترقیاتی مفادات کو نقصان پہنچتا ہے۔ ان کا کہنا تھا کہ امریکا کو چین کے ساتھ اپنے تعلقات کو حقیقت پسندانہ انداز میں دیکھنا چاہیے۔

چینی ترجمان نے واضح کیا کہ اگر ضروری ہوا تو چین اپنے دفاع کے لیے ٹھوس اور فیصلہ کن اقدامات کرے گا۔ یہ بیان ایسے وقت میں سامنے آیا ہے جب امریکی سینیٹ نے بدھ کے روز 901 ارب ڈالر کے دفاعی بجٹ کی منظوری دی، جو سال 2026 کے لیے پینٹاگون کی پالیسیوں اور اخراجات کا تعین کرتا ہے۔

اس دفاعی بل میں چین کو ایک بڑے چیلنج کے طور پر پیش کیا گیا ہے اور ایشیا پیسیفک خطے میں امریکی فوجی مشنوں کی کامیابی کو یقینی بنانے پر زور دیا گیا ہے۔ اس کے علاوہ اس قانون میں تائیوان کے ساتھ سکیورٹی تعاون کے لیے ایک ارب ڈالر کی رقم بھی شامل کی گئی ہے۔

امریکی صدر ڈونلڈ ٹرمپ نے حال ہی میں اس دفاعی قانون پر دستخط بھی کر دیے ہیں۔ وائٹ ہاؤس کی جانب سے جاری بیان میں ٹرمپ نے کہا کہ یہ قانون ان کے "طاقت کے ذریعے امن” کے ایجنڈے کو آگے بڑھاتا ہے، امریکا کی داخلی سلامتی اور دفاعی صنعتی ڈھانچے کو مضبوط بناتا ہے اور فوج کے جنگی جذبے کو کمزور کرنے والے غیر ضروری پروگراموں کا خاتمہ کرتا ہے۔