چین خطے میں تمام تنازعات کے پُرامن حل کا خواہاں ہے

?️ 22 اگست 2025

چین خطے میں تمام تنازعات کے پُرامن حل کا خواہاں ہے

چین کے وزیر خارجہ وانگ یی نے کہا ہے کہ بیجنگ خطے میں تمام تنازعات کے پُرامن حل کا خواہاں ہے اور پاکستان کے ساتھ انسدادِ دہشت گردی کے شعبے میں تعاون کو مزید مستحکم بنایا جائے گا۔

انہوں نے جمعرات کو اسلام آباد میں اپنے پاکستانی ہم منصب سینیٹر محمد اسحاق ڈار کے ساتھ چھٹے دور کے تزویراتی مذاکرات کے بعد مشترکہ پریس کانفرنس سے خطاب کرتے ہوئے کہا کہ پاکستان اور چین کے درمیان تعلقات فولادی نوعیت کے ہیں جو وقت کے ساتھ مزید مضبوط ہوتے جا رہے ہیں۔

وانگ یی نے کہا کہ چین بین الاقوامی اصولوں کی روشنی میں خطے کے تمام تنازعات کو پُرامن طریقے سے حل کرنے پر یقین رکھتا ہے۔ انہوں نے مزید کہا کہ چین کثیر الجہتی تعاون، ترقی پذیر ممالک کے ساتھ روابط اور عالمی سطح پر باہمی شراکت داری کے فروغ کا حامی ہے۔

چینی وزیر خارجہ نے دہشت گردی کے خلاف پاکستان کے اقدامات کو سراہتے ہوئے کہا کہ انسدادِ دہشت گردی کے میدان میں دونوں ممالک کی ہم آہنگی اور تعاون کو مزید بڑھایا جائے گا۔

اس موقع پر پاکستان کے نائب وزیراعظم اور وزیر خارجہ اسحاق ڈار نے چین کے ساتھ تزویراتی تعلقات کو انتہائی اہم قرار دیا اور کہا کہ پاک-چین اقتصادی راہداری (CPEC) کے دوسرے مرحلے کو آگے بڑھایا جا رہا ہے۔ انہوں نے اعلان کیا کہ وزیر اعظم شہباز شریف اگلے ماہ چین میں شنگھائی تعاون تنظیم (SCO) کے سربراہ اجلاس میں شرکت کریں گے اور اس موقع پر چین کی اعلیٰ قیادت سے ملاقاتیں بھی کریں گے۔

ترجمان دفتر خارجہ کے مطابق دونوں وزرائے خارجہ نے مذاکرات کے دوران دو طرفہ تعلقات، اقتصادی و تجارتی تعاون، سی پیک کے دوسرے مرحلے اور علاقائی و عالمی امور پر تفصیلی تبادلہ خیال کیا۔

مذاکرات کے اختتام پر پاکستان اور چین نے اپنے تعلقات کو ہر شعبے میں مزید فروغ دینے اور خطے میں امن و استحکام کے لیے مل کر کام کرنے کے عزم کا اعادہ کیا۔