ٹرمپ کا نیا کاروبار، یوٹیوب بھی 2020 کے انتخابات کے ہارے ہوئے امیدوار کو کروڑوں ڈالر ادا کرے گا

ٹرمپ کا نیا کاروبار، یوٹیوب بھی 2020 کے انتخابات کے ہارے ہوئے امیدوار کو کروڑوں ڈالر ادا کرے گا

 امریکی صدر ڈونلڈ ٹرمپ کی جانب سے دائر کردہ مقدمے کے بعد ویڈیو شیئرنگ پلیٹ فارم یوٹیوب نے 22 ملین ڈالر کی ادائیگی پر رضامندی ظاہر کر دی ہے۔ یہ مقدمہ ٹرمپ کے اکاؤنٹ کو 6 جنوری 2021 کے واقعات کے بعد معطل کیے جانے پر دائر کیا گیا تھا۔

فرانسیسی خبر رساں ادارے کے مطابق، گوگل کی ذیلی کمپنی یوٹیوب ٹیکنالوجی کی ان بڑی کمپنیوں میں تازہ اضافہ ہے جنہوں نے ٹرمپ کے ساتھ عدالت کے باہر سمجھوتہ کیا ہے۔ ٹرمپ کا کہنا تھا کہ انہیں بلا جواز سنسر کیا گیا۔

رپورٹ کے مطابق، یہ رقم ٹرمپ کے نئے منصوبے، وائٹ ہاؤس میں ایک نئی ضیافت گاہ کی تعمیر پر خرچ کی جائے گی۔ اس کے علاوہ یوٹیوب نے ٹرمپ کے قریبی اتحادیوں، بشمول "امریکن کنزرویٹو یونین” کو بھی 25 لاکھ ڈالر دینے پر اتفاق کیا ہے۔

واضح رہے کہ 2020 کے صدارتی انتخابات میں شکست اور کیپیٹل ہل پر ان کے حامیوں کے حملے کے بعد فیس بک، ٹوئٹر اور یوٹیوب نے ٹرمپ کے اکاؤنٹس کو بلاک کر دیا تھا تاکہ مزید تشدد کو روکا جا سکے۔ یوٹیوب نے 12 جنوری 2021 کو "تشدد کے خطرے” کا حوالہ دیتے ہوئے ٹرمپ کی نئی ویڈیوز اپ لوڈ کرنے پر پابندی لگا دی تھی۔

اگرچہ قانونی ماہرین نے ٹرمپ کے مقدمات کو کمزور قرار دیا تھا اور کہا تھا کہ امریکی آئین کی پہلی ترمیم صرف حکومت کو آزادی اظہار پر قدغن لگانے سے روکتی ہے، لیکن بڑی ٹیکنالوجی کمپنیاں ٹرمپ کے دوبارہ اقتدار میں آنے کے بعد سمجھوتوں کی راہ اختیار کر رہی ہیں۔

اس سے قبل، جنوری میں کمپنی "میٹا” نے 25 ملین ڈالر اور فروری میں ایلون مسک کی کمپنی "ایکس” نے تقریباً 10 ملین ڈالر ٹرمپ کو ادا کیے تھے۔ اسی طرح میڈیا کمپنی "پیراماؤنٹ گلوبل” نے بھی ایک انٹرویو کے تنازع پر ٹرمپ سے صلح کے لیے 16 ملین ڈالر ادا کیے۔