ٹرمپ کا میمفس میں نیشنل گارڈ بھیجنے کا اعلان 

سچ خبریں: صدر امریکا ڈونلڈ ٹرمپ نے دارالحکومت واشنگٹن ڈی سی میں پولیس کے اختیارات اپنے ہاتھ میں لینے کے غیر معمولی اقدامات کے تسلسل میں، ٹینیسی ریاست کے شہر میمفس میں نیشنل گارڈ کے دستے تعینات کرنے کا اعلان کیا ہے۔

امریکی شہروں میں تشدد کی شرح میں کمی کے باوجود، ٹرمپ جرائم کو مرکزی سیاسی مسئلہ بنانے پر تلے ہوئے ہیں۔ ڈیموکریٹس کے زیر قیادت شہروں اور ریاستوں میں ان کے حکم پر کی گئیں گرفتاریوں کے خلاف گزشتہ ہفتے واشنگٹن میں ہزاروں افراد کے مظاہرے سمیت ملک بھر میں احتجاجی مظاہرے ہوئے ہیں۔

صدر امریکا نے فاکس نیوز کو بتایا کہ ہم میمفس جا رہے ہیں۔ میمفس شدید مشکلات کا شکار ہے۔ ہم واشنگٹن میں کامیابی کے بعد اب وہاں بھی یہ مسئلہ حل کریں گے۔

انہوں نے مزید کہا کہ میمفس کے میئر، جو ایک ڈیموکریٹ ہیں، اس اقدام سے خوش اور مطمئن ہیں۔ تاہم، شہر کے میئر پال ینگ نے نامہ نگاروں سے کہا کہ انہوں نے نیشنل گارڈ تعینات کرنے کی درخواست نہیں کی تھی۔

ٹرمپ کے اس اقدام پر انہوں نے کہا کہ میں واضح کرنا چاہتا ہوں: میں نے نیشنل گارڈ کی درخواست نہیں کی، اور مجھے نہیں لگتا کہ اس سے جرائم کی شرح کم ہوگی۔ تاہم، یہ فیصلہ کر لیا گیا ہے، اور بطور شہر کے میئر، میں اس بات کو یقینی بنانے کے لیے پرعزم ہوں کہ یہ تعیناتی مؤثر طریقے سے ہو اور ہماری کمیونٹی کو مضبوط بنائے۔

امریکی وفاقی تحقیقاتی بیورو (FBI) کے اعداد و شمار کے مطابق، دریائے مسیسپی کے کنارے آباد 611,000 کی آبادی والا میمفس، امریکا کے سب سے زیادہ جرائم پیشہ علاقوں میں سے ایک ہے۔ مردم شماری بیورو کے مطابق، شہر کے تقریباً 24 فیصد شہری غربت کا شکار ہیں، جو قومی اوسط سے دوگنا زیادہ ہے۔

صدر ٹرمپ کی پہلی مدت میں، امریکی محکمہ انصاف نے 2020 میں جرائم سے نمٹنے کے لیے وفاقی دستے اس شہر میں بھیجے تھے۔