وائٹ ہاؤس میں تنازع شدت اختیار کر گیا، میلینیا ٹرمپ نے مشرقی ونگ کی مسماری پر تشویش کا اظہار کیا

وائٹ ہاؤس میں تنازع شدت اختیار کر گیا، میلینیا ٹرمپ نے مشرقی ونگ کی مسماری پر تشویش کا اظہار کیا

 وائٹ ہاؤس میں ایک نئے تنازع نے جنم لے لیا ہے جب خاتونِ اول میلینیا ٹرمپ نے عمارت کے مشرقی حصے کی مسماری اور وہاں ایک ڈانس ہال کی تعمیر کے منصوبے پر اپنی گہری تشویش ظاہر کی ہے۔

امریکی کانگریس سے وابستہ نیوز ویب سائٹ دی ہل‘کی رپورٹ کے مطابق، میلینیا ٹرمپ نے اپنے قریبی حلقوں میں اس منصوبے سے لاتعلقی کا اظہار کیا ہے اور واضح کیا ہے کہ یہ منصوبہ ان کی تجویز نہیں ہے۔

گزشتہ ہفتے مشرقی ونگ کی مسماری کی تصاویر سامنے آنے کے بعد، وائٹ ہاؤس کی ترجمان کیرولین لیوٹ نے ردِعمل دیتے ہوئے ان اعتراضات کو "مصنوعی غصہ” قرار دیا اور کہا کہ تقریباً تمام امریکی صدور نے اپنے دورِ اقتدار میں وائٹ ہاؤس میں تبدیلیاں کی ہیں۔

تجزیہ کاروں اور بعض سیاسی مخالفین کا کہنا ہے کہ اس ونگ کی مسماری سے وائٹ ہاؤس کی تاریخی حیثیت اور اس کی شناخت بطور "عوام کا گھر” متاثر ہوگی۔

رپورٹ کے مطابق، میلینیا ٹرمپ کی ناراضگی کی ایک بڑی وجہ یہ بھی ہے کہ مشرقی ونگ طویل عرصے سے خاتونِ اول کے دفتر اور عملے کا مرکز رہا ہے۔

دوسری جانب، حکومت کا کہنا ہے کہ یہ منصوبہ مکمل شفافیت کے ساتھ انجام دیا جا رہا ہے اور اس کی فنڈنگ نجی ذرائع سے ہو رہی ہے۔ وائٹ ہاؤس نے حال ہی میں عطیات دینے والے اداروں کی فہرست جاری کی ہے جن میں ایمیزون، ایپل، اور گوگل جیسی بڑی کمپنیاں شامل ہیں۔