نیتن یاہو کی اتحادی حکومت کے ختم ہونے کا خدشہ بڑھ گیا

 اسرائیلی وزیر اعظم بنیامین نتانیاہو کی قیادت میں قائم اتحادی حکومت ایک مرتبہ پھر اندرونی اختلافات کے سبب شدید دباؤ کا شکار ہے، اور اس کے ٹوٹنے کے امکانات میں نمایاں اضافہ ہوا ہے۔

عبرانی زبان کے روزنامے معاریو کے مطابق، غزہ کی پٹی میں عالمی دباؤ کے تحت محدود انسانی امداد کی اجازت دینے کا فیصلہ، نیتن یاہو کے سخت گیر اتحادیوں کو برہم کر گیا ہے۔ خاص طور پر وزیر خزانہ بتسلئیل اسموتریچ اور وزیر داخلی سلامتی ایتمار بن گویر نے اس فیصلے پر شدید ناراضی کا اظہار کیا ہے۔

اتحادیوں کا شدید ردعمل

بتسلئیل اسموتریچ نے اعلان کیا ہے کہ ان کی جماعت آئندہ کابینہ میں اپنی شمولیت پر ازسرنو غور کے لیے ہنگامی سیاسی مشاورت کر رہی ہے۔ ان کا کہنا تھا کہ وزیر اعظم نتانیاہو پر اعتماد کا بحران پیدا ہو چکا ہے۔

دوسری جانب، بن گویر کی جماعت بھی اس بات پر غور کر رہی ہے کہ آیا وہ حکومت میں شامل رہے یا نہیں۔ اگر ان جماعتوں میں سے کوئی ایک بھی اتحاد سے نکلتی ہے تو حکومت کی پارلیمانی اکثریت ختم ہو سکتی ہے۔

حکومتی اتحاد کا غیر یقینی مستقبل

یہ پہلا موقع نہیں کہ نتانیاہو کے حکومتی اتحاد میں اختلافات سامنے آئے ہیں، تاہم اب کی بار اختلافات اتنے شدید ہیں کہ حکومت کے خاتمے کا خدشہ بڑھ گیا ہے۔ اس سے قبل بھی مذہبی جماعت یہدوت ہتوراہ حکومت سے علیحدہ ہو چکی ہے۔

سیاسی تجزیہ کاروں کا کہنا ہے کہ غزہ میں جاری انسانی بحران اور عالمی برادری کی طرف سے بڑھتے ہوئے دباؤ کے جواب میں نیتن یاہو کی جانب سے نرم رویہ اختیار کرنا ان کے دائیں بازو کے اتحادیوں کے لیے ناقابل قبول ہے۔