نیتن یاہو غزہ کی جنگ ختم نہیں کرنا چاہتے

یروشلم میں صہیونی یرغمالیوں کے اہل خانہ نے وزیرِاعظم بنیامین نیتن یاہو پر شدید تنقید کرتے ہوئے الزام عائد کیا ہے کہ وہ جان بوجھ کر غزہ کی جنگ ختم نہیں کرنا چاہتے اور یرغمالیوں کی رہائی کے بجائے سیاسی مقاصد کے لیے وقت ضائع کر رہے ہیں۔

الجزیرہ کے مطابق منگل کو جاری ایک بیان میں یرغمالیوں کے اہل خانہ نے کہا کہ حکومت نے ان سے جھوٹ بولا ہے اور جان بوجھ کر جنگ جاری رکھنے کا فیصلہ کیا ہے۔ انہوں نے مطالبہ کیا کہ حکومت سیاسی کھیل بند کرے، تمام یرغمالیوں کو فوری طور پر واپس لائے اور فوج کو غزہ سے نکالے۔

بیان میں مزید کہا گیا کہ جنگ کا تسلسل نہ صرف یرغمالیوں اور فوجیوں کی جان کو خطرے میں ڈال رہا ہے بلکہ اس سے اسرائیل کو کوئی فائدہ نہیں ہوگا اور یہ صرف فلسطینی ریاست کے قیام کے امکانات کو بڑھا رہا ہے۔

یہ تنقید ایسے وقت میں سامنے آئی ہے جب اسرائیلی معاشرے میں جنگ بندی اور یرغمالیوں کے تبادلے کے معاہدے کے لیے دباؤ بڑھتا جا رہا ہے، جبکہ سکیورٹی کابینہ نے حال ہی میں شہرِ غزہ پر قبضے کا منصوبہ منظور کیا ہے۔

اس فیصلے نے اسرائیل کی سیاسی، عسکری اور سکیورٹی قیادت میں اختلافات کو مزید گہرا کر دیا ہے۔ اپوزیشن لیڈر یائیر لاپید نے اس منصوبے کو تباہ کن قرار دیا ہے۔

بین الاقوامی سطح پر بھی کئی ممالک، عالمی اداروں اور انسانی حقوق کی تنظیموں نے غزہ پر قبضے کے منصوبے کی مذمت کرتے ہوئے جنگ فوری روکنے اور فائر بندی پر زور دیا ہے۔