نیتن یاہو اور ٹرمپ کی ملاقات میں ترکی پر ہوگی بات چیت

نیتن یاہو اور ٹرمپ کی ملاقات میں ترکی پر ہوگی بات چیت

صہیونی ذرائع ابلاغ کے مطابق آئندہ دنوں اسرائیلی وزیرِاعظم بنیامین نیتن یاہو اور امریکی صدر ڈونلڈ ٹرمپ کے درمیان ہونے والی ملاقات میں ترکی ایک مرکزی اور حساس موضوع کے طور پر زیرِ بحث آئے گا، خصوصاً غزہ سے متعلق مجوزہ بین الاقوامی فورس اور انقرہ کے ممکنہ کردار کے حوالے سے۔

 صہیونی ٹی وی چینل 14 کے سیاسی رپورٹر تامیر موراغ نے رپورٹ کیا ہے کہ اسرائیل غزہ میں جنگ بندی کے بعد مجوزہ بین الاقوامی استحکام فورس میں ترکیہ کی کسی بھی قسم کی شمولیت—چاہے فوجی ہو یا غیر فوجی—کو مکمل طور پر مسترد کرتا ہے۔ یہی مؤقف نیتن یاہو اپنے متوقع دورۂ امریکا کے دوران ٹرمپ کے سامنے واضح طور پر رکھیں گے۔

رپورٹ کے مطابق، امریکی ساختہ ایف-35 جنگی طیاروں کی ترکیہ کو فروخت بھی نیتن یاہو اور ٹرمپ کے درمیان گفتگو کے اہم نکات میں شامل ہوگی۔ یہ ملاقات رواں ماہ کے آخر میں فلوریڈا میں متوقع ہے اور اسے واشنگٹن کے ساتھ اسرائیل کی ’’سرخ لکیروں‘‘ کے امتحان کے طور پر دیکھا جا رہا ہے۔

صہیونی حکومت کے ایک اعلیٰ سیاسی ذریعے نے چینل 14 کو بتایا کہ تل ابیب، غزہ میں ترکیہ کی کسی بھی شکل میں موجودگی کو ناقابلِ قبول سمجھتا ہے۔ اس کے باوجود امریکی حکام پسِ پردہ ترکیہ کی علامتی یا بالواسطہ شمولیت کے امکانات پر غور کر رہے ہیں، جن میں محدود ترک موجودگی، غیر فوجی کردار یا ترکیہ کی جانب سے حماس کے بعض رہنماؤں اور فلسطینی کارکنوں کی ملک بدری جیسے اقدامات شامل ہو سکتے ہیں۔

دوسری جانب امریکی نائب صدر جے ڈی وینس اور وزیر خارجہ مارک روبیو نے واضح کیا ہے کہ واشنگٹن اس معاملے میں اسرائیل پر ترکیہ کی شمولیت مسلط نہیں کرے گا۔

موراغ کے مطابق، اسرائیلی دباؤ کے باعث ترکیہ نے حال ہی میں قطر میں منعقد ہونے والی امریکی سینٹرل کمانڈ (سینٹکام) کی کانفرنس میں شرکت بھی نہیں کی، جس میں 35 سے زائد ممالک نے حصہ لیا تھا۔

صہیونی ذرائع کا کہنا ہے کہ ترکیہ کے علاوہ غزہ معاہدے کے نفاذ کا فریم ورک، حماس اور حزب اللہ کو غیر مسلح کرنا، اور ایران کے خلاف سیاسی و سلامتی دباؤ میں اضافے جیسے موضوعات بھی نیتن یاہو اور ٹرمپ کی گفتگو کے ایجنڈے میں شامل ہوں گے۔

تجزیہ کاروں کے مطابق، اسرائیل نیتن یاہو کے دورۂ امریکا سے قبل ایران، حماس اور حزب اللہ کے خلاف سیکیورٹی دعوؤں پر مبنی ایک جامع فائل تیار کر رہا ہے تاکہ وائٹ ہاؤس پر ’’محورِ مزاحمت‘‘ کے خلاف سخت اقدامات کے لیے دباؤ ڈالا جا سکے۔