مذاکرات ہی ایران کے جوہری مسئلے کا حل ہیں:مصر

مذاکرات ہی ایران کے جوہری مسئلے کا حل ہیں:مصر

مصر نے ایران کے جوہری معاملے پر کشیدگی میں کمی اور باہمی اتفاقِ رائے سے حل تلاش کرنے کی حمایت کا اعادہ کیا ہے۔ مصری وزیر خارجہ نے کہا ہے کہ قاہرہ خطے کے استحکام اور سلامتی کے لیے سفارتی کوششوں کی مکمل تائید کرتا رہے گا۔

 مصر کے وزیر خارجہ بدر عبدالعاطی نے اپنے عمانی ہم منصب بدر بن حمد البوسعیدی سے ٹیلی فونک گفتگو میں مسقط میں امریکہ اور ایران کے درمیان ہونے والے حالیہ مذاکرات پر تبادلۂ خیال کیا۔ اس موقع پر عمانی وزیر خارجہ نے مصری ہم منصب کو مذاکرات کی پیش رفت اور تفصیلات سے آگاہ کیا۔

بدر عبدالعاطی نے ایران اور امریکہ کے درمیان مذاکرات کی میزبانی اور سہولت کاری میں عمان کے تعمیری کردار کو سراہتے ہوئے کہا کہ مصر خطے میں کشیدگی کم کرنے اور غیر مستحکم صورتحال پر قابو پانے کے لیے اپنی کوششیں جاری رکھے گا۔

مصری وزیر خارجہ نے واضح کیا کہ قاہرہ ہر اُس اقدام اور سفارتی کوشش کی حمایت کرتا رہے گا جو ایران کے جوہری معاملے پر ایک متفقہ حل کی طرف لے جائے، ایسا حل جو تمام فریقوں کے تحفظات اور مفادات کو مدنظر رکھتے ہوئے علاقائی سلامتی اور استحکام کو فروغ دے۔

انہوں نے اس بات پر بھی زور دیا کہ ان مذاکرات سے حاصل ہونے والی پیش رفت کو استعمال کرتے ہوئے خطے کو عدم استحکام کے نئے دَور میں داخل ہونے سے بچایا جانا چاہیے۔

دوسری جانب، عمانی وزیر خارجہ بدر البوسعیدی نے حالیہ ہفتوں میں مصر کی متحرک سفارتی سرگرمیوں کو سراہتے ہوئے کہا کہ قاہرہ نے مختلف فریقوں کے مؤقف قریب لانے اور مذاکرات کی راہ ہموار کرنے میں مؤثر کردار ادا کیا ہے۔

اسی سلسلے میں، مصری وزیر خارجہ نے بین الاقوامی ایٹمی توانائی ایجنسی کے ڈائریکٹر جنرل رافائل گروسی سے بھی ٹیلی فونک گفتگو کی، جس میں ایران کے جوہری معاملے سے متعلق تازہ صورتحال پر تبادلۂ خیال کیا گیا۔

بدر عبدالعاطی نے اس گفتگو میں ایک بار پھر خطے میں کشیدگی کم کرنے، علاقائی و بین الاقوامی تعاون بڑھانے اور سفارتی حل کو آگے بڑھانے کے لیے مصر کے عزم کا اعادہ کیا اور کہا کہ قاہرہ امن، سلامتی اور استحکام کے فروغ کے لیے اپنی مشاورت اور کوششیں جاری رکھے گا۔