فلسطین کی تسلیم کے بعد برطانیہ کی نئی شرائط سامنے آگئیں

فلسطین کی تسلیم کے بعد برطانیہ کی نئی شرائط سامنے آگئیں

برطانیہ کی جانب سے فلسطین کو بطور ملک تسلیم کرنے کے بعد اب وزیر اعظم کیئر اسٹارمر نے اس کے ساتھ مکمل سیاسی تعلقات قائم کرنے کے لیے متعدد شرائط رکھ دی ہیں۔

روسیا الیوم کے مطابق، برطانوی اخبار ٹیلی گراف نے رپورٹ کیا ہے کہ اسٹارمر نے فلسطینی اتھارٹی سے مطالبہ کیا ہے کہ وہ ان خاندانوں کو دی جانے والی امداد بند کرے جن کے افراد اسرائیل مخالف کارروائیوں میں شہید یا گرفتار ہوئے ہیں۔

مزید برآں، وزیر اعظم برطانیہ چاہتے ہیں کہ فلسطینی نصاب میں موجود ان کتابوں کو تبدیل کیا جائے جنہیں لندن یہود مخالف قرار دیتا ہے۔ اسی طرح انہوں نے اس بات پر بھی زور دیا ہے کہ مشرقی قدس میں برطانوی سفارتخانے کے افتتاح یا کسی بین الاقوامی معاہدے پر دستخط سے قبل فلسطین میں نئے انتخابات کرائے جائیں۔ ذرائع کا کہنا ہے کہ مزید شرائط بھی عائد کی جا سکتی ہیں۔

یاد رہے کہ برطانیہ نے اتوار کے روز باضابطہ طور پر فلسطین کو تسلیم کیا تھا۔ تاہم لبنان کے دروزی رہنما اور سابق سوشلسٹ پروگریسیو پارٹی کے سربراہ ولید جنبلاط نے اس اقدام کو ریاکاری کی انتہا قرار دیا۔

انہوں نے کہا کہ بلفور اعلامیہ کے جرم کو گزرے 108 سال بعد، برطانیہ کا یہ فیصلہ فلسطینی عوام کے ساتھ کسی ہمدردی کا مظہر نہیں بلکہ محض تاریخی منافقت ہے۔

قابل ذکر ہے کہ 1917 میں برطانیہ نے اعلان بلفور جاری کر کے یہودیوں کو فلسطین کی تاریخی سرزمین پر ایک جعلی ریاست قائم کرنے کا حق دیا تھا، جب کہ اس وقت فلسطین برطانیہ کے زیرِ انتظام تھا۔