فلسطینی ریاست کا قیام اسرائیل کی سیاسی شکست ہوگی:صہیونی وزیر خارجہ

فلسطینی ریاست کا قیام اسرائیل کی سیاسی شکست ہوگی:صہیونی وزیر خارجہ

 اسرائیل کے وزیرِ خارجہ گدعون ساعر نے ایک بار پھر کھل کر فلسطینی ریاست کے قیام کی مخالفت کرتے ہوئے کہا ہے کہ دو ریاستی حل کوئی حل نہیں بلکہ ایک مسئلہ ہے، اور اس حوالے سے کسی بھی قسم کی پسپائی اسرائیل کے لیے سیاسی شکست ثابت ہوگی۔

ساعر نے اسرائیلی چینل 14 سے گفتگو میں کہا کہ تل ابیب ہرگز فلسطینی ریاست کے قیام کی اجازت نہیں دے گا اور بین الاقوامی دباؤ کا مقابلہ کرنے کے لیے مختلف آپشنز پر غور کر رہا ہے۔

اس سے قبل وزیراعظم بنیامین نیتن یاہو بھی متعدد مواقع پر واضح کر چکے ہیں کہ اسرائیل کبھی آزاد فلسطینی ریاست کے قیام کو قبول نہیں کرے گا۔

اسی طرح دائیں بازو کی کابینہ کے وزراء، جیسے وزیرِ داخلی سلامتی ایتامار بن گویر اور وزیرِ خزانہ بزالل اسموتریچ بھی بارہا اعلان کر چکے ہیں کہ دو ریاستی منصوبہ اسرائیل کے وجود کے لیے خطرہ ہے اور اسے مکمل طور پر مسترد کیا جانا چاہیے۔

اسرائیلی میڈیا، بشمول روزنامہ معاریو اور یدیعوت احرونوت، نے رپورٹ دی ہے کہ انتہا پسند دائیں بازو کے وزراء مسلسل نیتن یاہو پر دباؤ ڈال رہے ہیں تاکہ کسی بھی قسم کی بات چیت کو روک دیا جائے جو فلسطینی ریاست کے قیام کی طرف لے جا سکتی ہو۔