غزہ میں صحافیوں کو بھوک و قتل سے نشانہ بنانا بند کیا جائے: چیک صحافیوں کا کھلا خط

غزہ میں صحافیوں کو بھوک و قتل سے نشانہ بنانا بند کیا جائے: چیک صحافیوں کا کھلا خط

جمہوریہ چیک کے ایک گروہ صحافیوں نے اپنے صدر اور وزرا کو خط لکھ کر غزہ میں صحافیوں کے خلاف اسرائیل کے وحشیانہ اقدامات کی شدید مذمت کی ہے اور مطالبہ کیا ہے کہ جان بوجھ کر بھوکا رکھنے اور ہدف بنا کر قتل کرنے کا یہ سلسلہ فوراً ختم ہو۔

چیک نیوز ویب سائٹ دنیک آلارم کے مطابق اس خط کا متن بین الاقوامی اداروں جیسے کمیٹی ٹو پروٹیکٹ جرنلسٹس رپورٹرز وِدآؤٹ بارڈرز اور انٹرنیشنل پریس انسٹیٹیوٹ کی مشترکہ اپیل سے ماخوذ ہے۔ کئی نمایاں چیک صحافی اس مہم کے دستخط کنندگان میں شامل ہیں۔

خط میں کہا گیا ہے کہ یہ اپیل ایسے وقت سامنے آئی ہے جب اسرائیلی فوج نے جان بوجھ کر الجزیرہ کے مزید چھ صحافیوں کو قتل کر دیا۔ دستخط کنندگان کے مطابق:

غزہ کے صحافی بھوک سے مارے جا رہے ہیں، نہ علامتی طور پر اور نہ آہستہ آہستہ، بلکہ جان بوجھ کر اور دنیا کی آنکھوں کے سامنے۔ یہ محض حادثہ نہیں بلکہ سوچی سمجھی حکمتِ عملی ہے تاکہ سچائی کو دبایا جا سکے۔

اکتوبر 2023 سے اب تک 230 سے زائد صحافی اور میڈیا ورکرز غزہ میں شہید ہو چکے ہیں۔ جو باقی بچے ہیں وہ اپنے اہلِ خانہ کے ساتھ مستقل خوف میں جی رہے ہیں، بنیادی ضروریات سے محروم ہیں اور نہیں جانتے کہ موت ان تک بمباری کے ذریعے پہنچے گی یا بھوک کے ذریعے۔

خط میں کہا گیا کہ اگر دنیا خاموش رہی تو یہ نہ صرف انسانی المیہ ہوگا بلکہ غزہ کی سچائی کا قتل بھی شمار ہوگا۔ صحافت کا فرض ہے کہ ہم اپنی آواز بلند کریں، خاموشی بدترین خیانت ثابت ہوگی۔

یاد رہے کہ حالیہ دنوں میں اسرائیلی فوج نے اسپتال الشفا کے قریب صحافیوں کے خیمے پر میزائل حملہ کر کے پانچ الجزیرہ صحافیوں کو شہید کر دیا۔ اس کے بعد صحافیوں کی شہادتوں کی تعداد 230 سے تجاوز کر گئی