عراق کی مذہبی مناسبات کو یونیسکو کے عالمی ورثے میں شامل کرنے کی تجویز

?️ 16 دسمبر 2025

عراق کی مذہبی مناسبات کو یونیسکو کے عالمی ورثے میں شامل کرنے کی تجویز

 عراقی حکومت نے اسلامی مذہبی مناسبات کو اقوام متحدہ کے ذیلی ادارے یونیسکو کی عالمی ثقافتی ورثہ فہرست میں شامل کرنے کی باضابطہ تجویز پیش کر دی ہے۔

عراقی میڈیا کے مطابق یونیسکو میں عراق کے مستقل نمائندے اسعد ترکی سواری نے اسلامی ممالک کے سفیروں کے اجلاس کے دوران دو اہم تجاویز پیش کیں۔ انہوں نے بتایا کہ پہلی تجویز حضور اکرم حضرت محمد ﷺ کی ولادت باسعادت کے سالانہ جشن کی حمایت سے متعلق ہے جبکہ دوسری تجویز قرآن کریم کے مقدمے کو یونیسکو کی عالمی یادداشت  کی فہرست میں درج کرانے کے بارے میں ہے۔

ان کا کہنا تھا کہ قرآن کریم کو عالمی یادداشت کی فہرست میں شامل کرنے کا مقصد بعض ممالک کی جانب سے انتہا پسند عناصر کو دی جانے والی اجازتوں کا سدباب کرنا ہے، جن کے تحت قرآن کریم کی بے حرمتی، اس کو نذر آتش کرنے یا پھاڑنے جیسے واقعات پیش آتے ہیں جو مسلمانوں کے جذبات کو شدید ٹھیس پہنچاتے ہیں۔ عراق نے اس اقدام کو اسلامی مقدسات کے تحفظ اور بین الاقوامی سطح پر احترام کو فروغ دینے کی ایک اہم کوشش قرار دیا ہے۔