صیہونیوں کی ایرانی امور کے نگراں امریکی نمائندے کا سیل فون ہیک کرنے کی کوشش

?️ 4 دسمبر 2021

سچ خبریں:صہیونی کمپنی این ایس او کے سکینڈل کے بعد امریکی محکمہ خارجہ کے کم از کم 9 ملازمین کے آئی فونزاس کمپنی کے اسپائی ویئر کے ذریعے ہیک کر لیے گئے اور ایرانی امور کے نگراں امریکی نمائندے کے سیل کو بھی ہیک کرنے کی کوشش کی گئی۔
روئٹرز خبر رساں ادارے کی رپورٹ کےمطابق باخبرذرائع نے بتایا کہ امریکی محکمہ خارجہ کے کم از کم نو ملازمین کے آئی فونز کو گمنام ہیکرز نے متنازع صہیونی کمپنی این ایس او کے جدید اسپائی ویئر کا استعمال کرتے ہوئے ہیک کر لیا ، باخبر ذرائع نے بتایا کہ ہیکنگ حملے گزشتہ چند مہینوں میں ہوئے اور ان میں یوگنڈا میں مقیم امریکی محکمہ خارجہ کے اس عملے کو نشانہ بنایا گیا جواس مشرقی افریقی ملک سے متعلق مسائل پر توجہ مرکوز کر رہے تھے۔

روئٹرز کا کہنا ہے کہ ہیکرز کے حملےصیہونی این ایس او ٹیکنالوجی کا استعمال کرتے ہوئے امریکی حکام کے خلاف سب سے بڑے پیمانے پر ہیکنگ آپریشن کی نمائندگی کرتے ہیں، دوسری جانب برطانوی اخبار گارڈین نے خبر دی ہے کہ ایرانی امور کے نگراں امریکی نمائندے راب مالی بھی ان لوگوں میں سے ایک تھے جن کا نمبر این ایس او کے ایک صارف نے منتخب کیا تھا، تاہم اس بات کا کوئی ثبوت نہیں ہے کہ ان کا موبائل فون ہیک ہوا ہے یانہیں۔

واضح رہے کہ امریکی حکام کے سیل فون نمبرز کی فہرست پہلے بھی شامل کی گئی تھی، لیکن یہ واضح نہیں تھا کہ آیا ہیکر کا حملہ کامیاب تھا یا نہیں، روئٹرز نے اپنی رپورٹ میں لکھا ہے کہ ابھی تک ملازمین پر ان ہیکنگ حملوں کے مرتکب افراد کی شناخت نہیں ہو سکی ہے۔