شمالی نائیجیریا میں مسلح حملے میں ہلاکتوں کی تعداد 50 

سچ خبریں:شمال مغربی نائیجیریا کی ریاست زامفارا میں مسلح افراد کے حملے میں ہلاکتوں کی تعداد 50 تک پہنچ گئی ہے۔ یہ حملہ تونگان دوتسی قصبے کے مضافات میں ایک گاؤں پر کیا گیا۔

نائیجیریا کی پارلیمنٹ کے رکن حمیسو فارو نے اناطولیہ نیوز ایجنسی کو بتایا کہ موٹر سائیکلوں پر سوار مسلح افراد نے گاؤں میں داخل ہوکر اندھا دھند فائرنگ کی۔

انہوں نے مزید بتایا کہ 50 افراد کے قتل کے علاوہ حملہ آوروں نے خواتین اور بچوں سمیت بڑی تعداد میں افراد کو اغواء کرلیا۔

زامفارا ریاست کے اس رکن پارلیمنٹ نے یہ بھی بتایا کہ حملہ آوروں نے گاؤں کے متعدد مکانات کو آگ لگادی، جس سے قیمتی سامان جل کر تباہ ہوگیا۔

انہوں نے بتایا کہ حملے کے بعد علاقے میں خوف و ہراس کی ایسی فضا ہے کہ رہائشی رات بھر جاگتے رہے۔

نائیجیریا میں گزشتہ کئی سالوں سے مسلح گروہوں کے حملوں کا سلسلہ جاری ہے۔ ان حملوں کے علاوہ بوکو حرام اور مغربی افریقہ میں داعش سے منسلک گروپ اسلامی ریاست ویسٹ افریقہ پروونس (ISWAP) بھی ملک کے مختلف علاقوں میں کارروائیاں کرتے ہیں۔

نائیجیریا میں اغواء کی سنگین سزا کے باوجود یہ واقعات تھمتے نہیں جا رہے۔ عام طور پر مسلح افراد ملک کے شمالی علاقوں میں گاؤں، اسکول اور مسافروں کو تاوان کے لیے اغواء کرتے ہیں۔