شام میں چرچ پر دہشتگردانہ حملہ

?️ 24 جولائی 2022

سچ خبریں:شامی ذرائع ابلاغ کا کہنا ہے کہ اس ملک کے شہر حما کے مضافات میں ایک چرچ کی افتتاحی تقریب پر تحریر الشام دہشت گرد گروہ نے راکٹ حملہ کیا جس میں 14 افراد ہلاک اور زخمی ہو گئے ہیں۔
شام کے سرکاری ذرائع ابلاغ کی رپورٹ کے مطابق اس ملک کے مغرب میں واقع حما شہر کے نواحی علاقے الثقلبیہ میں آیا صوفیہ چرچ کی افتتاحی تقریب پر دہشت گرد گروہ تحریر الشام کے راکٹ حملے میں 2 افراد شہید اور 12 زخمی ہو گئے۔

رپورٹ کے مطابق یہ پہلا موقع نہیں ہے کہ تحریر الشام یا سابقہ النصرہ فرنٹ کے دہشت گردوں نے اپنے مقاصد کے حصول اور شامی عوام کے مختلف طبقات کے درمیان تفرقہ پیدا کرنے کے لیے ایسے جرائم کا ارتکاب کیا ہے۔

یاد رہے کہ 2016 میں اپنے اوپر سے دہشتگرد تنظیم کا لیبل ہٹانے کے لیے اس گروپ نے اعلان کیا کہ اس نے دہشت گرد تنظیم القاعدہ سے علیحدگی اختیار کر لی ہے اور ابو محمد الجولانی نے اس کا نام بدل کر فتح الشام فرنٹ رکھ لیا لیکن سب پر واضح تھا کہ نام کی تبدیلی سے گروپ ممبران کی رائے نہیں بدلے گی۔

اسی طرح جنوری 2017 میں ایک بار پھر شامی حکومت کے مخالف دہشت گرد گروہ ملک کے شمال مغرب میں ضم ہو گئے اور اس گروہ نے اپنا نام تبدیل کر کے تحریر الشام رکھ لیا، تاہم یہ اب بھی دنیا کے بیشتر ممالک میں دہشت گرد گروہوں کی فہرست میں شامل ہے۔