جاپان کی تاریخ کا سب سے بڑا بجٹ منظور،770 ارب ڈالر

جاپان کی تاریخ کا سب سے بڑا بجٹ منظور،770 ارب ڈالر

جاپانی حکومت نے آئندہ مالی سال 2026 کے لیے ملک کی تاریخ کا سب سے بڑا بجٹ حتمی شکل دے دی ہے، جس کا مجموعی حجم 122.3 ٹریلین ین (تقریباً 770 ارب امریکی ڈالر) مقرر کیا گیا ہے۔ یہ بجٹ مہنگائی میں اضافے اور بدلتے معاشی حالات کے پیش نظر گزشتہ 12 برسوں میں پہلی بڑی مجموعی نظرثانی کے بعد تیار کیا گیا ہے۔

جاپانی سرکاری نشریاتی ادارے این ایچ کے نے رپورٹ کیا ہے کہ نیا بجٹ موجودہ مالی سال کے ابتدائی بجٹ کے مقابلے میں 7 ٹریلین ین سے زائد ہے، جو ایک نیا ریکارڈ ہے۔ موجودہ سال کا بجٹ تقریباً 115.19 ٹریلین ین تھا۔

اخراجات کے لحاظ سے، سماجی تحفظ پر خرچ بڑھ کر 39.1 ٹریلین ین تک پہنچنے کی توقع ہے، جبکہ حکومتی بانڈز کی ادائیگی اور سود کے لیے مختص رقم شرحِ سود میں اضافے کے باعث ریکارڈ 31.3 ٹریلین ین تک جا سکتی ہے۔

آمدنی کی جانب، ٹیکس محصولات کے 83.7 ٹریلین ین تک پہنچنے کا امکان ہے، تاہم حکومت تقریباً 29.6 ٹریلین ین کے نئے حکومتی بانڈز جاری کرنے کا بھی ارادہ رکھتی ہے، جو موجودہ مالی سال کے مقابلے میں زیادہ ہے۔

حکومت اس بجٹ کی باضابطہ منظوری 26 دسمبر کو کابینہ کے اجلاس میں دینے کا ارادہ رکھتی ہے۔

وزیر داخلہ و مواصلات ہایاشی اور وزیر خزانہ کے درمیان مذاکرات کے بعد مقامی ٹیکس کی تقسیم کے لیے 20.2 ٹریلین ین مختص کرنے پر اتفاق ہوا، جو رواں مالی سال سے 1.2 ٹریلین ین زیادہ ہے۔ اس کے ساتھ ہی مقامی حکومتوں کو بعض عارضی ٹیکسوں کے خاتمے سے ہونے والے نقصان کی مکمل تلافی گرانٹس کے ذریعے کی جائے گی۔

وزیر تعلیم ماتسوموتو نے قومی جامعات اور تحقیقی منصوبوں کے لیے 1.971 ٹریلین ین کے بجٹ کی منظوری دی، جو گزشتہ سال کے مقابلے میں 18.8 ارب ین زیادہ ہے۔ اس کے علاوہ روایتی جاپانی ثقافت، جیسے چائے کی رسم، خطاطی اور خوراکی ثقافت کو محفوظ بنانے کے لیے بھی اضافی فنڈز رکھے گئے ہیں۔

زرعی شعبے میں کسانوں کی تعداد میں متوقع کمی کے پیش نظر زمین کی بہتر تقسیم اور جدید ٹیکنالوجی کے فروغ کے لیے خصوصی اقدامات شامل کیے گئے ہیں۔ وزیر دفاع کوائیزومی نے خود دفاعی افواج کے اہلکاروں کی سہولیات بہتر بنانے کے لیے تقریباً 600 ارب ین اور ڈرون پر مبنی ساحلی دفاعی نظام کے لیے 100 ارب ین مختص ہونے کی تصدیق کی۔

ادھر بچوں کے امور کی وزیر کیگاوادا نے غیر رجسٹرڈ بچوں کی نگہداشت کے مراکز کے لیے سبسڈی میں 3.7 ارب ین اضافے کا اعلان کیا، جس سے تقریباً 6 لاکھ والدین پر مالی بوجھ کم ہونے کی توقع ہے۔

ماہرین کے مطابق، یہ بجٹ جاپان کو درپیش معاشی، سماجی اور دفاعی چیلنجز سے نمٹنے کے لیے حکومت کی جامع حکمتِ عملی کی عکاسی کرتا ہے۔