تل ابیب اسٹاک مارکیٹ چھٹے روز بھی گراوٹ کا شکار

تل ابیب اسٹاک مارکیٹ چھٹے روز بھی گراوٹ کا شکار

 اسرائیلی اخبار یدیعوت آحارونوت کے مطابق تل ابیب اسٹاک ایکسچینج مسلسل چھٹے روز بھی شدید گراوٹ کا شکار رہی، جس کی بڑی وجہ سرمایہ کاروں کے اعتماد میں کمی اور بڑھتی ہوئی معاشی بے یقینی بتائی جا رہی ہے۔

رپورٹ کے مطابق بدھ کو اہم اشاریوں میں نمایاں کمی ریکارڈ کی گئی۔ TA35 انڈیکس 1.88 فیصد، TA90 انڈیکس 2.38 فیصد اور TA125 انڈیکس 1.99 فیصد گر گئے۔ اسی طرح بینکنگ انڈیکس میں 2.64 فیصد اور انشورنس انڈیکس میں سب سے زیادہ یعنی 4.3 فیصد کمی دیکھنے میں آئی۔

ذرائع کے مطابق وزیراعظم بنیامین نیتن یاہو کے حالیہ بیانات نے مارکیٹ پر گہرا منفی اثر ڈالا ہے۔ انہوں نے ایک پریس کانفرنس میں اعتراف کیا تھا کہ اسرائیل سیاسی تنہائی کا شکار ہے اور اسے عالمی دباؤ کے پیش نظر ایک خود کفیل اور بند معیشت کی طرف جانا ہوگا۔

یہ اعترافات مارکیٹ کے لیے بڑے دھچکے کا باعث بنے اور سرمایہ کاروں میں خوف و بے اعتمادی کی لہر دوڑ گئی، جس کے بعد تل ابیب اسٹاک مارکیٹ شدید مندی کی لپیٹ میں آ گئی۔