بشاراسد کے بعد شام اسرائیل کے لیے آسان ہدف بنتا جا رہا ہے 

?️ 9 دسمبر 2025

بشار اسد کے بعد شام اسرائیل کے لیے آسان ہدف بنتا جا رہا ہے 

آج آٹھ دسمبر کو شام میں بشار الاسد حکومت کے خاتمے اور احمد الشرع کی قیادت میں عبوری حکومت کے قیام کا پہلا سال مکمل ہو گیا ہے۔ اس ایک سال کے دوران شامی عوام کو استحکام کے بجائے مزید عدم تحفظ، اندرونی جھڑپوں اور بیرونی مداخلت کا سامنا کرنا پڑا ہے، جبکہ اسرائیل نے اس عرصے میں شامی سرزمین کے مزید حصوں پر قبضہ بڑھایا۔

اسد خاندان نے 1970 میں اقتدار سنبھالا تھا اور کئی دہائیوں تک اقتدار میں رہا، تاہم 2011 میں عوامی احتجاج اور بعد ازاں خانہ جنگی نے نظام کو کمزور کر دیا۔ بالآخر 2024 میں بشار الاسد کی حکومت کا خاتمہ ہوا اور وہ روس کے دارالحکومت ماسکو فرار ہو گئے۔ ان کے بعد احمد الشرع المعروف ابو محمد الجولانی کی قیادت میں عبوری حکومت قائم ہوئی، مگر ایک سال گزرنے کے باوجود عوام کی مشکلات کم نہ ہو سکیں۔

ملک کے مختلف حصوں میں مسلح جھڑپیں جاری رہیں، خاص طور پر ساحلی علاقوں اور صوبہ السویداء میں اقلیتی برادریوں کے خلاف حملوں میں اضافہ ہوا، جس پر علوی اور دروز برادریوں نے شدید تحفظات کا اظہار کیا۔ علویوں کی اعلیٰ کونسل کے سربراہ شیخ غزال غزال نے سالگرہ کے موقع پر پانچ روزہ ملک گیر ہڑتال کا اعلان کرتے ہوئے کہا کہ عوام پر دباؤ ڈال کر ایسی تقریبات میں شرکت پر مجبور کیا جا رہا ہے جو دراصل عوام کے خون پر استوار کی گئی ہیں۔

انہوں نے کہا کہ جس دن کو آمریت کے خاتمے کی علامت ہونا چاہیے تھا وہ دن وطن کے باقی ماندہ حصوں کے زوال کا سبب بن گیا۔ ان کے مطابق شامی عوام نے گزشتہ برسوں میں گرفتاریاں، قتل، اغوا اور گھروں کو نذر آتش ہوتے دیکھا اور اب معاشی دباؤ کے ذریعے انہیں خاموش کرنے کی کوشش کی جا رہی ہے۔

ایک بین الاقوامی حقوقی ادارے کی رپورٹ کے مطابق اسد حکومت کے خاتمے کے بعد سے اب تک شام میں دہشت گردی اور پرتشدد واقعات میں دس ہزار سے زائد افراد ہلاک ہو چکے ہیں، جن میں سینکڑوں خواتین اور بچے شامل ہیں۔ اسی دوران عبادت گاہوں، مساجد، کلیساؤں اور مقدس مقامات پر حملوں میں بھی اضافہ ہوا ہے، جس سے فرقہ وارانہ تناؤ مزید شدت اختیار کر گیا ہے۔

اندرونی بدامنی کے ساتھ ساتھ اسرائیل نے بھی شامی سرزمین پر اپنی کارروائیاں تیز کر دیں۔ اسرائیلی فوج نے شامی فوجی اڈوں اور بنیادی ڈھانچے کو بارہا نشانہ بنایا اور جولان سے متصل درعا اور قنیطرہ کے علاقوں میں اپنی موجودگی بڑھائی۔ صرف نومبر کے مہینے میں اسرائیل کی جانب سے دو سو سے زائد زمینی اور فضائی خلاف ورزیوں کی اطلاع دی گئی، جن میں فائرنگ، گھروں پر چھاپے، گرفتاریاں اور میزائل حملے شامل ہیں۔

اطلاعات کے مطابق عبوری شامی حکومت اسرائیل کے ساتھ ممکنہ سکیورٹی معاہدے کی راہیں بھی تلاش کر رہی ہے، حالانکہ سرکاری سطح پر اس کی تردید کی جاتی ہے۔ عبوری وزیر خارجہ اسعد الشیبانی نے اسرائیل کو عبوری دور کا سب سے بڑا چیلنج قرار دیتے ہوئے کہا کہ شام تمام فریقوں سے پرامن تعلقات چاہتا ہے، مگر جب تک اسرائیل مقبوضہ علاقوں سے دستبردار نہیں ہوتا، کسی معاہدے کا کوئی جواز نہیں۔

احمد الشرع نے سالگرہ کے موقع پر اپنے خطاب میں دعویٰ کیا کہ شام درست سمت میں گامزن ہے اور حکومت کے تمام اقدامات عوام کے مفاد میں ہیں۔ انہوں نے کہا کہ دنیا شامی مناطق سے اسرائیل کے انخلا کے مطالبے کی حمایت کر رہی ہے اور شام کو ایک مستحکم نمونہ بنانے کی کوششیں جاری ہیں۔

اسی موقع پر حکومت کے حامی شہریوں نے مختلف شہروں میں تقریبات کا انعقاد کیا، جبکہ احمد الشرع نے فوجی لباس میں مسجد اموی میں نماز فجر ادا کی اور خطاب کرتے ہوئے کہا کہ کوئی طاقت شام کے راستے میں رکاوٹ نہیں بن سکتی۔ انہوں نے یہ بھی بتایا کہ حالیہ دورۂ سعودی عرب کے دوران ولی عہد محمد بن سلمان نے خانہ کعبہ کے غلاف کا ایک ٹکڑا بطور تحفہ دیا ہے، جسے مسجد اموی میں محفوظ رکھا جائے گا۔