برطانیہ میں ٹرمپ کے دورے کے موقع پر احتجاجی مظاہروں کا آغاز

برطانیہ میں ٹرمپ کے دورے کے موقع پر احتجاجی مظاہروں کا آغاز

امریکہ کے صدر ڈونلڈ ٹرمپ کے دورہ برطانیہ سے چند گھنٹے قبل ہی ان کی پالیسیوں کے مخالفین نے احتجاجی مظاہروں کا سلسلہ شروع کر دیا۔ مظاہرین نے قلعہ وِنڈسر کے باہر جمع ہو کر بینرز اٹھائے جن پر لکھا تھا ہم ٹرمپ کا خیرمقدم نہیں کرتے اورٹرمپ ایک مجرم، نسل پرست اور جھوٹا شکست خوردہ ہے۔

یہ دوسرا موقع ہے کہ ٹرمپ سرکاری دورے پر برطانیہ پہنچ رہے ہیں۔ ان کے پروگرام کے مطابق وہ سب سے پہلے وِنڈسر پہنچ کر شاہ چارلس سوم سے ملاقات کریں گے۔

اسکاٹ لینڈ یارڈ کے مطابق، لندن میں ایک بڑی سیکیورٹی آپریشن کے لیے ۱۶۰۰ سے زائد پولیس اہلکار تعینات کیے گئے ہیں، جن میں سے ۵۰۰ افسران دیگر شہروں سے بلائے گئے ہیں۔پولیس نے قانونِ نظم عامہ کے تحت مظاہروں پر پابندیاں عائد کی ہیں اور ہدایت دی ہے کہ مرکزی اجتماع شام ۷ بجے تک ختم ہونا چاہیے۔

کل (بدھ) تقریباً ۵۰ تنظیمیں لندن کے مختلف مقامات پر احتجاج کریں گی۔مظاہرین دوپہر ۲ بجے بی بی سی کی عمارت کے سامنے جمع ہوں گے اور پھر پارلیمنٹ اسکوائر کی جانب مارچ کریں گے۔

احتجاج کی قیادت کرنے والا اتحاد اسٹاپ ٹرمپ کولیشن مزدور یونینوں، طلبہ تنظیموں اور سماجی گروپوں پر مشتمل ہے۔اس اتحاد نے ایک بیان میں ٹرمپ کو اندرونِ ملک نسل پرست آمر اور بیرونِ ملک جنگ پسند قرار دیا اور کہا کہ ان کا دورہ ایسے وقت پر ہو رہا ہے جب وزیراعظم اسٹارمر کی حکومت ریڈ کارپٹ بچھا کر ایٹمی اور ٹیکنالوجی کے سودے کر رہی ہے، جو عوام کے بجائے صرف امیر طبقے کے فائدے کے لیے ہیں۔

بدھ کے روز طلبہ اور طالبات کلاسوں کا بائیکاٹ کر کے احتجاج میں شامل ہوں گے۔اجتماع میں نمایاں سیاسی شخصیات جیسے جرمی کوربن (سابق لیڈر لیبر پارٹی) اور زَیک پولانسکی (لیڈر گرین پارٹی) بھی خطاب کریں گے۔