ایران کے خلاف ٹرمپ کی نئی دھمکی پر روسی وزارت خارجہ کا ردعمل

سچ خبریں:  روسی وزارت خارجہ کے ترجمان ماریا زاخارووا نے امریکی صدر ڈونلڈ ٹرمپ کی ایران کے خلاف حالیہ دھمکیوں پر ردعمل ظاہر کرتے ہوئے کہا ہے کہ ہمیں ان مہلک غلطیوں کو دہرانے سے گریز کرنا چاہیے جو فریقین کو مسلے کے حل سے دور کرتی ہیں۔

انہوں نے اسرائیل کے ایران کے خلاف ممکنہ عسکری حملوں، بشمول اس کے جوہری ڈھانچے کو نشانہ بنانے کے بیانات پر بھی تشویش کا اظہار کیا۔

زاخارووا نے زور دیا کہ ایسی دھمکیاں بین الاقوامی قوانین اور اقوام متحدہ کے چارٹر کے منافی ہیں، جوہری عدم پھیلاؤ کے نظام کو کمزور کرتی ہیں اور خطے میں تابکاری اور انسانی المیے کا سبب بن سکتی ہیں۔

انہوں نے کشیدگی میں اضافہ نہ کرنے اور معاہدوں کی پاسداری اور ایران کے جائز مفادات کو مدنظر رکھتے ہوئے سفارتی معاہدے کی طرف بڑھنے کی اپیل کی۔

اس سے قبل کریملن کے ترجمان دیمتری پسکوف نے بھی امریکی صدر کی ایران کے خلاف دھمکیوں پر ردعمل ظاہر کیا تھا۔

انہوں نے کہا کہ ہمارا خیال ہے کہ ایسے اقدامات سے گریز کرنا ضروری ہے جو مشرق وسطیٰ میں صورتحال کو مزید کشیدہ کرسکتے ہیں۔

پسکوف نے زور دیا کہ ہمارا یقین ہے کہ ہر چیز سے پہلے ایران سے مذاکرات ضروری ہیں۔

کریملن کے ترجمان نے واضح کیا کہ روس ایران کے ساتھ اپنے مضبوط تعلقات کو فروغ دیتا رہے گا۔

واضح رہے کہ صدر ٹرمپ نے گذشتہ شب ایران کے خلاف اپنے دعوے دہراتے ہوئے کہا تھا کہ میں امید کرتا ہوں کہ ایران اپنے جوہری پروگرام کی تعمیر نو نہیں کرے گا، ورنہ ہمارے پاس دوبارہ حملے کے سوا کوئی چارہ نہیں ہوگا۔ ممکن ہے ایران کا برا رویہ ہو، لیکن یہ بات ابھی ثابت نہیں ہوئی ہے۔