ایران اور سعودی عرب کے وزرائے خارجہ آئندہ چند روز میں ملاقات کریں گے:سعودی سرکاری ذرائع ابلاغ

?️ 3 اپریل 2023

سچ خبریں:سعودی سرکاری ذرائع ابلاغ کا کہنا ہے کہ ایران اور سعودی عرب کے وزرائے خارجہ نے ٹیلی فونک گفتگو میں آئندہ چند روز میں ملاقات پر اتفاق کیا۔

سعودی عرب کی سرکاری خبر رساں ایجنسی (واس) کی رپورٹ کے مطابق سعودی وزیر خارجہ فیصل بن فرحان نے اتوار کے روز ایران کے وزیر خارجہ حسین امیر عبداللہیان کے ساتھ ٹیلی فون پر بات چیت کی جس میں دونوں فریقین نے آئندہ چند دنوں میں دو طرفہ ملاقات پر اتفاق کیا۔

اس رپورٹ کے مطابق ایران اور سعودی عرب کے وزرائے خارجہ نے اپنی دو طرفہ ملاقات کے وقت پر تبادلہ خیال کیا ہے اور ایک مخصوص وقت کا تعین کیا ہے،سعودی عرب کی سرکاری خبر رساں ایجنسی نے اطلاع دی ہے کہ فیصل بن فرحان اور امیر عبداللہیان نے دونوں ممالک کے لیے تشویش کے اہم امور پر بھی تبادلہ خیال کیا اور بیجنگ میں ہونے والے حالیہ سہ فریقی معاہدے کے بعد مستقبل کے اقدامات پر بھی بات چیت کی۔

یاد رہے کہ اس سے قبل حسین امیرعبداللہیان سے ایرانی یوم جمہوریہ کے موقع پر کی قومی پرچم کشائی کی تقریب میں ایک صحافی نے سوال کیا کہ سعودی وزیر خارجہ کے ساتھ آپ کی ملاقات کے وقت اور جگہ کے بارے میں مختلف قیاس آرائیاں کی جارہی ہیں، اس سلسلہ میں آپ کا کیا کہنا ہے؟ اور کیا اس ملاقات کے وقت اور جگہ کا تعین کیا جاچکا ہے ؟ انہوں نے سوال کے جواب میں کہا کہ میں اگلے 48 گھنٹوں کے اندر اپنے سعودی ہم منصب سے بات کرنے اور مشاورت کرنے جا رہا ہوں اور ہم اس گفتگو میں ہم اپنی ملاقات کے وقت اور جگہ کو حتمی شکل دیں گے۔

قابل ذکر ہے کہ ایران اور سعودی عرب نے گزشتہ 10 مارچ کو بیجنگ میں کیے گئے ایک معاہدے کے تحت دونوں ممالک کے درمیان سفارتی تعلقات کی بحالی کا اعلان کیا ، اس بنیاد پر دونوں ممالک میں سفارت خانے اور سفارتی مشن اگلے دو ماہ میں دوبارہ کھول دیے جائیں گے۔