ایران امریکہ مذاکرات کے بارے میں عراقی وزیر خارجہ کا تازہ ترین موقف

سچ خبریں:عراقی وزیر خارجہ فواد حسین نے ایران اور امریکہ کے درمیان جاری مذاکرات کے حوالے سے اہم بیان دیتے ہوئے امید ظاہر کی ہے کہ ان مذاکرات کے نتائج مثبت ہوں گے اور ایک ایسا معاہدہ طے پائے گا جو دونوں ممالک اور پورے خطے کے مفاد میں ہوگا۔

الجزیرہ نیٹ ورک کو دیے گئے ایک خصوصی انٹرویو میں عراقی وزیر خارجہ فواد حسین نے کہا کہ تمام متعلقہ فریقوں کو چاہیے کہ وہ ایران اور امریکہ کے درمیان مذاکراتی عمل کی حمایت کریں اور اس کے تسلسل کو یقینی بنائیں۔ ان کا مزید کہنا تھا کہ عمان ایران اور امریکہ کے درمیان ثالثی کا کردار ادا کر رہا ہے اور بغداد اور مسقط کے درمیان اس حوالے سے مکمل ہم آہنگی پائی جاتی ہے۔

عراقی وزیر خارجہ نے امریکہ اور ایران کے رہنماؤں کے درمیان ممکنہ ملاقات کی دعوت کو انتہائی مثبت قدم قرار دیتے ہوئے اسے درست سمت میں اٹھایا گیا اقدام قرار دیا۔

واضح رہے کہ فواد حسین کو عراقی کردستان کی ڈیموکریٹک پارٹی کی جانب سے عراق کے صدارتی الیکشن کا امیدوار نامزد کیا گیا ہے۔ اس حوالے سے انہوں نے کہا کہ انہیں پورا یقین ہے کہ پارلیمنٹ میں سیاسی جماعتوں اور دھڑوں کی حمایت حاصل کرنے کے لیے ان کے پاس بہترین مواقع موجود ہیں۔

داعش کے قیدیوں کی منتقلی کے موضوع پر گفتگو کرتے ہوئے فواد حسین نے بتایا کہ عراق متعدد عرب اور مغربی ممالک کے ساتھ رابطے میں ہے تاکہ داعش کی تحویل میں موجود اپنے شہریوں کو واپس لایا جا سکے۔