انسانی حقوق کی تنظیموں نے غزہ کے بارے امریکہ سے کیا کہا؟

?️ 21 دسمبر 2023

سچ خبریں: انسانی حقوق کی متعدد تنظیموں نے امریکی وزیر دفاع کو لکھے گئے خط میں غزہ کی پٹی کے شہریوں کو امداد فراہم کرنے اور مکینوں کے جبری انخلاء کو روکنے کے مقصد سے تل ابیب کے لیے واشنگٹن کی امداد کو معطل کرنے کی درخواست کی ۔

اسپوٹنک نیوز ایجنسی کی رپورٹ کے مطابق مغربی میڈیا نے بتایا ہے کہ ہیومن رائٹس واچ اور ایمنسٹی انٹرنیشنل سمیت انسانی حقوق کی متعدد تنظیموں نے امریکی وزیر دفاع لائیڈ آسٹن کو ایک خط ارسال کیا ہے جس میں اسرائیل کے لیے امریکی امداد کی معطلی کا مطالبہ کیا گیا ہے۔

یہ بھی پڑھیں: امریکی قومی سلامتی کے مشیر کا دورۂ تل ابیب کیسا رہا؟

خط میں کہا گیا ہے کہ انسانی حقوق کی تنظیمیں پینٹاگون سے مطالبہ کرتی ہیں کہ وہ اسرائیل کی جانب سے فلسطینی شہریوں پر حملے اور غزہ کی پٹی کے رہائشیوں کو انسانی امداد سے محروم کرنے کی سختی سے مخالفت کرے نیز امریکی حکومت اسرائیل کو امداد کی فراہمی بند کرے۔

خط میں مزید آیا ہے کہ انسانی حقوق کے کارکن چاہتے ہیں کہ امریکہ غزہ کی پٹی کے رہائشیوں کی جبری نقل مکانی کی مخالفت کرے اور امن علاقے بنائے۔

انسانی حقوق کی تنظیموں نے اس خط میں لکھا ہے کہ دستاویزی اور معتبر ثبوتوں کی بنیاد پر معلوم ہے کہ اسرائیلی سکیورٹی فورسز نے (غزہ کی پٹی میں) انسانی حقوق کی سنگین خلاف ورزیاں کی ہیں لہذا ایسے قوانین پر عمل درآمد کیا جانا چاہیے کہ اسرائیل کو امریکہ کی جانب سے بعض امداد کی فراہمی کو روکا جا سکے۔

پولیٹیکو اخبار نے اطلاع دی ہے کہ اس خط پر دستخط کرنے والوں میں سیو دی چلڈرن، نارویجن ریفیوجی کونسل، سینٹر فار وکٹم آف ٹارچر اور دیگر بین الاقوامی تنظیموں کے امریکی نمائندے شامل ہیں۔

مزید پڑھیں: فلسطینیوں کی نسل کشی کس کے اشاروں پر ہو رہی ہے؟امریکی تجزیہ کار کی زبانی

غزہ کی پٹی میں فلسطینی اتھارٹی کے انفارمیشن آفس نے بدھ کی شب ایک بیان میں اعلان کیا ہے کہ 7 اکتوبر کو جنگ کے آغاز سے اب تک غزہ میں شہید ہونے والوں کی تعداد 20 ہزار تک پہنچ گئی ہے۔

بیان میں مزید کہا گیا ہے کہ شہداء میں 8000 بچے اور 6200 خواتین ہیں۔

بیان کے آخر میں اس بات پر زور دیا گیا ہے کہ اس جنگ میں اب تک 52600 افراد زخمی ہو چکے ہیں۔