امریکی صدر ٹرمپ کا مخالفین کو برطرف کرنا ریڈ لائن کی کھلی خلاف ورزی

امریکی صدر ٹرمپ کا مخالفین کو برطرف کرنا ریڈ لائن کی کھلی خلاف ورزی

امریکی میڈیا کے مطابق صدر ڈونلڈ ٹرمپ نے ایک بار پھر اپنے سیاسی مخالفین کے خلاف سخت اقدامات کرتے ہوئے ان افراد کو عہدوں سے ہٹانا شروع کر دیا ہے جو ان کے احکامات کو ماننے سے انکار کرتے ہیں۔ تجزیہ کاروں کا کہنا ہے کہ یہ رویہ صدر کی طاقت کے بارے میں ان کے غیر حقیقی تصور اور ریاستی اداروں کو اپنی مرضی کے تابع کرنے کی کوشش کو ظاہر کرتا ہے۔

امریکی جریدے نیویارکر کے مطابق، ٹرمپ نے حال ہی میں اریک سیبرٹ نامی وفاقی پراسیکیوٹر کو برطرف کر دیا، جسے صرف پانچ ماہ قبل ورجینیا کے مشرقی ضلع کے لیے نامزد کیا گیا تھا۔ سیبرٹ نے استعفیٰ دیا، مگر ٹرمپ نے سوشل میڈیا پر اعلان کیا کہ میں نے اسے برطرف کیا ہے۔

رپورٹس کے مطابق، اصل وجہ یہ تھی کہ سیبرٹ نے ٹرمپ کے دو بڑے ناقدین  نیویارک کی اٹارنی جنرل لتیشیا جیمز اور سابق ایف بی آئی ڈائریکٹر جیمز کومی – کے خلاف مجرمانہ مقدمات چلانے سے انکار کیا تھا۔ یہی اختلاف ان کی برطرفی کا سبب بنا۔

ماہرین کے مطابق، ٹرمپ کی دوسری مدتِ صدارت میں صورت حال مختلف ہے، کیونکہ اس بار وہ قانونی اور اخلاقی رکاوٹوں کی پرواہ کیے بغیر اپنے مخالفین کے خلاف براہ راست کارروائیاں کر رہے ہیں۔ پہلی مدت میں مشیروں اور قانونی ماہرین کی رکاوٹیں موجود تھیں، لیکن اب وہ رکاوٹیں ہٹتی جا رہی ہیں۔

تجزیہ نگاروں کے مطابق، ٹرمپ کی حکمت عملی یہ ہے کہ وہ مسلسل تنازعات اور غیر قانونی اقدامات کے ذریعے عوام کو "بحران کی زیادتی” کا عادی بنا دیں تاکہ لوگ بتدریج ان غیر معمولی اقدامات پر ردعمل دینا چھوڑ دیں۔

ان کا کہنا ہے کہ ٹرمپ نہ صرف پراسیکیوٹرز کو اپنی مرضی کے مطابق ہٹا رہے ہیں بلکہ میڈیا کو دھمکیاں دینے اور فوجی طاقت کو غیر قانونی مقاصد کے لیے استعمال کرنے جیسے اقدامات بھی اس رویے کا حصہ ہیں۔

سیاسی ماہرین خبردار کر رہے ہیں کہ یہ اقدامات امریکی عدلیہ اور حکومتی اداروں کی آزادی کے لیے سنگین خطرہ ہیں اور یہ ظاہر کرتے ہیں کہ صدر ریاستی طاقت کو ذاتی اور سیاسی مقاصد کے لیے استعمال کرنے سے دریغ نہیں کر رہے۔