امریکی ایلچی کی سعودی عہدیداروں سے ملاقات

🗓️ 13 ستمبر 2022

سچ خبریں:یمن کے امور کے لیے امریکہ کے خصوصی ایلچی نے سعودی عرب کے سفیر اور خلیج فارس تعاون کونسل کے سکریٹری جنرل سے ملاقات کی اور یمن کی صورتحال پر تبادلہ خیال کیا۔

یمن کے امور میں امریکہ کے خصوصی ایلچی ٹموتھی لنڈرکنگ نے یمن میں جنگ بندی کو بڑھانے کی کوشش کے سلسلہ میں اس ملک میں تعینات سعودی عرب کے سفیر محمد بن سعید آل جابر اور خلیج فارس تعاون کونسل کے سکریٹری جنرل نائف الحجرف سے ریاض میں الگ الگ ملاقات کی۔

اس ملاقات میں آل جابر اور لنڈرکنگ نے یمن میں جنگ بندی کو برقرار رکھنے کی اہمیت پر زور دیا اور اس جنگ بندی کی کامیابی کے لیے کوشش کرنے کو ضروری قرار دیا، سعودی عرب کی خبر رساں ایجنسی واس نے اطلاع دی ہے کہ اس اجلاس میں تعز کی سڑکوں کو دوبارہ کھولنے، یمن کے مرکزی بینک کے کھاتوں میں رقوم جمع کرنے کی ضرورت پر غور کیا گیا تاکہ 2014 کی ادائیگی کے طریقہ کار کے مطابق شہریوں کی تنخواہوں کی ادائیگی کی جا سکے نیز اس بات پر بھی زور دیا گیا کہ موجودہ جنگ بندی کا ہدف یمن میں جنگ بندی کے ایک جامع معاہدے تک پہنچنا ہے۔

واضح رہے کہ لنڈرکنگ نے خلیج فارس تعاون کونسل کے سکرٹری جنرل نائف الحجرف سے بھی ملاقات کی اور الحجرف نے یمن میں سلامتی، امن اور استحکام کو مضبوط بنانے کے سلسلہ میں اقوام متحدہ کی تمام کوششوں کے لیے خلیج فارس تعاون کونسل کی حمایت پر تاکید کی۔