امریکہ شام پر سے پابندیاں فوری ہٹائے،نہ کہ معطل کرے:چین

?️ 14 فروری 2023

سچ خبریں:ترکی اور شام میں آنے والے زلزلے اور ان دونوں ممالک کے زلزلے سے متاثرہ افراد کے حوالے سے امریکہ اور مغربی ممالک کے دوہرے رویے پر تنقید کرتے ہوئے چینی حکومت نے اس بات پر زور دیا کہ واشنگٹن کو شام کے خلاف پابندیاں فوری طور پر منسوخ کرنی چاہیے۔

روئٹرز خبر رساں ادارے کی رپورٹ کے مطابق چینی وزارت خارجہ کے ترجمان وانگ وین بن نے شام کے شمالی علاقوں میں آنے والے زلزلے کے سلسلہ میں بات کرتے ہوئے اس بات پر زور دیا کہ امریکی حکومت شامی حکومت اور عوام کے خلاف عائد پابندیاں فوری طور پر منسوخ کرے۔

اس سلسلے میں انہوں نے پریس کانفرنس میں کہا کہ امریکی حکومت شام کے خلاف یکطرفہ پابندیوں کو عارضی طور پر معطل کرنے کے بجائے انہیں فوری طور پر منسوخ کرے اس لیے کہ شام کی حکومت اور عوام کے خلاف امریکہ کی ظالمانہ اور یکطرفہ پابندیوں نے زلزلہ سے متاثرہ علاقوں میں امداد کی فراہمی کے عمل کو ایک سنگین مسئلہ بنا دیا ہے۔

یاد رہے کہ اقوام متحدہ کے ہائی کمشنر برائے مہاجرین کے ترجمان نے بھی شام میں مہلک زلزلے کے ایک ہفتے بعد الجزیرہ کو انٹرویو دیتے ہوئے کہا کہ ہم شامی عوام کی مدد کے لیے حقیقی عزم چاہتے ہیں۔

شام کے موجودہ بحران کے بارے میں مغربی ممالک کے دوہری اور انسان دشمن روش کے بارے میں، اقوام متحدہ کے اس عہدیدار نے تاکید کی کہ ہم نہیں چاہتے کہ (شام کے زلزلے کے متاثرین کے لیے) حمایت کو لے کر سیاست کھیلی جائے۔

اقوام متحدہ کے ہائی کمشنر کے ترجمان نے یاد دلایا کہ شامی عوام کو اس وقت کپڑوں، خیموں اور حرارتی آلات کی ضرورت ہے،اس تنظیم کے عہدیدار نے زلزلے کے بعد شام کی زمینی صورتحال کو سیاست، سکیورٹی اور تنظیم کے لحاظ سے پیچیدہ قرار دیا اور کہا کہ صرف باب الھوی کراسنگ شامیوں کی ضروریات کو پورا کرنے کے لیے کافی نہیں ہے۔