امریکہ اور برطانیہ بحیرہ احمر کو فوجی اڈہ بنانے کی کوشش کر رہے ہیں:یمنی وزیر خارجہ

 امریکہ اور برطانیہ بحیرہ احمر کو فوجی اڈہ بنانے کی کوشش کر رہے ہیں:یمنی وزیر خارجہ

 یمن کی وزارتِ خارجہ نے ایک بیان میں کہا ہے کہ بحیرہ احمر اور باب المندب کی سلامتی اور استحکام اس وقت تک ممکن نہیں جب تک غیر ملکی جنگی بیڑوں کا انخلاء نہ ہو جائے۔

وزارتِ خارجہ نے واضح کیا کہ یمن بین الاقوامی قوانین کے احترام اور آبی گذرگاہوں کے تحفظ کی پالیسی پر کاربند ہے اور خطے کے ممالک کے ساتھ اجتماعی سلامتی کے اصولوں کے مطابق عمل کرتا ہے۔ بیان میں کہا گیا کہ بیرونی افواج کی موجودگی غیر قانونی ہے اور اسی وجہ سے خطے کے لیے خطرہ بن چکی ہے۔

صنعا نے امریکہ اور برطانیہ پر الزام عائد کیا کہ وہ بحیرہ احمر کو عسکری تصادم کا میدان بنانے اور ایسے اتحاد قائم کرنے کی کوشش کر رہے ہیں جن کا خطے کے عوامی مفادات سے کوئی تعلق نہیں۔

یمنی وزارتِ خارجہ کے مطابق، یمن کی بحیرہ احمر میں کارروائیاں صرف صہیونی مفادات کو نشانہ بناتی ہیں اور ان کا مقصد اسرائیل کو غزہ میں اپنی جارحیت روکنے پر مجبور کرنا ہے۔یہ بیان اس وقت سامنے آیا ہے جب گزشتہ روز اسرائیلی لڑاکا طیاروں نے الحدیدہ بندرگاہ پر 12 فضائی حملے کیے۔