امریکا کی مداخلت نے آسٹریلیا کو اینٹرنیٹ قوانین کے بارے میں جواب دینے پر مجبور کیا

?️ 21 نومبر 2025

امریکا کی مداخلت نے آسٹریلیا کو اینٹرنیٹ قوانین کے بارے میں جواب دینے پر مجبور کیا

امریکہ کی ایوانِ نمائندگان کی عدالتی کمیٹی کے ریپبلکن چیئرمین جِم جَردن نے آسٹریلوی ادارے ای سیفٹی کی سربراہ جُولی اِنمَن گرانٹ کو امریکی حامیانِ سنسرشپ کے ساتھ تعاون کا الزام لگاتے ہوئے انہیں آسٹریلیا کے انٹرنیٹ قوانین پر وضاحت کے لیے طلب کر لیا ہے۔ یہ اقدام مبصرین کے نزدیک واشنگٹن کی طرف سے آسٹریلیا کے داخلی ضابطوں میں کھلی مداخلت اور کینبرا پر سوشل میڈیا پابندیوں کے باعث دباؤ ڈالنے کے مترادف ہے۔

برطانوی خبر رساں ایجنسی روئٹرز کے مطابق جَردن نے اس وقت ردعمل ظاہر کیا جب گرانٹ امریکی یونیورسٹی اسٹینفورڈ میں ایک اجلاس میں شریک ہوئیں۔ جَردن نے اس اجلاس کو امریکہ میں اظہارِ رائے کی آزادی اور آئین کے پہلے ترمیمی حق کے لیے سنگین خطرہ قرار دیا۔

جَردن کا کہنا ہے کہ گرانٹ دنیا بھر میں مواد ہٹانے کی خواہشمند ہیں اور اسی بنا پر انہیں انٹرنیٹ قوانین کے اثرات سے متعلق سوالات کا جواب دینا ہوگا۔ ان کے مطابق آسٹریلیا کے نئے سوشل میڈیا قوانین، خصوصاً 16 سال سے کم عمر بچوں کی پلیٹ فارم تک رسائی پر پابندی، امریکیوں کی آزادیِ اظہار کے لیے خطرہ بن سکتے ہیں۔ کئی امریکی ٹیک کمپنیاں بھی ان قوانین پر اعتراض کر چکی ہیں۔

سوشل میڈیا پلیٹ فارم ایکس کے مالک ایلان مسک اور سابق ٹرمپ مشیران بھی گرانٹ پر سخت تنقید کرچکے ہیں اور انہیں سنسر شپ کمشنر قرار دیتے ہوئے آسٹریلیا کے قوانین کو نگرانی کا اوزار کہا ہے۔

جَردن نے اپنی طلبی میں گزشتہ سال کے ایک قانونی مقدمے کا حوالہ بھی دیا جس میں ای سیفٹی نے ایکس سے درخواست کی تھی کہ وہ سڈنی کے ایک چرچ میں چاقو بردار حملے کی ویڈیو شیئر کرنے والی پوسٹس ہٹائے، جسے پولیس نے دہشت گردی کا واقعہ قرار دیا تھا۔

انہوں نے یہ دعویٰ بھی کیا کہ گرانٹ نے آسٹریلیا میں سوشل میڈیا کے لیے عمر کی حد مقرر کرنے سے متعلق پالیسی کی جانچ کے لیے اسٹینفورڈ یونیورسٹی کی مدد لی، جو ان کے بقول ‘‘تشویش ناک تعلقات’’ کو ظاہر کرتا ہے۔

اس معاملے پر آسٹریلوی براڈکاسٹنگ کارپوریشن نے ای سیفٹی کے ایک ترجمان کے حوالے سے رپورٹ دی ہے کہ یہ ادارہ امریکہ میں کسی بھی صارف کو امریکی کمپنیوں کی فراہم کردہ مواد تک رسائی محدود کرنے کا کوئی عمل نہیں کرتا اور گرانٹ امریکی کانگریس کی درخواست کا جائزہ لے رہی ہیں۔