الجزائر کی پارلیمان میں فرانسیسی استعمار کو جرم قرار دینے کے تاریخی مسودے پر پہلی بار بحث

الجزائر کی پارلیمان میں فرانسیسی استعمار کو جرم قرار دینے کے تاریخی مسودے پر پہلی بار بحث

الجزائر کی پارلیمان نے ایک تاریخی اقدام کے تحت پہلی مرتبہ اس مسودۂ قانون پر باضابطہ بحث شروع کر دی ہے جس کا مقصد الجزائر میں فرانسیسی استعمار کے دور میں ہونے والے جرائم کو تسلیم کرنا اور استعمار کی کسی بھی قسم کی توجیہ یا تعریف کو جرم قرار دینا ہے۔ یہ پیش رفت ایسے وقت میں سامنے آئی ہے جب الجزائر اور فرانس کے تعلقات شدید تناؤ کا شکار ہیں۔

عرب میڈیا کے مطابق ہفتے کے روز عوامی قومی اسمبلی کے اجلاس میں اس مسودے پر علانیہ غور کیا گیا، جسے پارلیمان کے اسپیکر ابراہیم بوغالی نے ارکان اور حکومتی نمائندوں کے سامنے پیش کیا۔ اس سے قبل الجزائر کی تمام پارلیمانی جماعتیں اس بات پر متفق ہو چکی تھیں کہ یہ مسودہ اسپیکر کے ذریعے پیش کیا جائے، کیونکہ یہ ایک قومی مطالبہ ہے جو سیاسی اور جماعتی اختلافات سے بالاتر ہو کر تاریخی یادداشت کے تحفظ اور عوامی جدوجہد کے ورثے کے دفاع کی عکاسی کرتا ہے۔

ابراہیم بوغالی نے اجلاس کے دوران کہا کہ یہ محض ایک معمول کی پارلیمانی کارروائی نہیں بلکہ ایک حاکمانہ فیصلہ، اخلاقی مؤقف اور واضح سیاسی پیغام ہے جو الجزائر کے ناقابلِ تنسیخ حق اور شہداء کی قربانیوں سے وفاداری کا اظہار کرتا ہے۔ انہوں نے وضاحت کی کہ اس قانون کا مقصد فرانسیسی عوام کے خلاف نہیں بلکہ تاریخی حقائق کو سامنے لانا ہے، جس میں استعمار کے جرائم کی نشاندہی، فرانسیسی ریاست کی ذمہ داری کا تعین، سرکاری اعتراف اور معافی کے مطالبے کے طریقۂ کار، اور استعمار کی تعریف کو جرم قرار دینا شامل ہے۔

پارلیمان کے اسپیکر کے مطابق اس قانون کی بنیاد اس اصول پر ہے کہ انسانیت کے خلاف جرائم وقت گزرنے سے ختم نہیں ہوتے، نہ انہیں طاقت کے ذریعے جائز ٹھہرایا جا سکتا ہے اور نہ ہی خاموشی کے ساتھ فراموش کیا جا سکتا ہے۔ یہ مسودہ سات رکنی کمیٹی نے تیار کیا ہے جس میں مختلف پارلیمانی دھڑوں کے نمائندے اور ایک آزاد رکن شامل ہیں، اور توقع ہے کہ اسے آئندہ دنوں میں دیگر قوانین کے ساتھ ووٹنگ کے لیے پیش کیا جائے گا۔

یہ قانونی پیش رفت ایسے وقت میں ہو رہی ہے جب الجزائر اور فرانس کے تعلقات حالیہ برسوں کی بدترین کشیدگی سے گزر رہے ہیں۔ خاص طور پر مغربی صحارا کے معاملے پر فرانس کی جانب سے مراکش کے خودمختاری منصوبے کی حمایت نے اختلافات کو مزید گہرا کر دیا ہے، کیونکہ الجزائر اس خطے کے حقِ خود ارادیت کا حامی ہے۔ اس کے علاوہ، فرانسیسی استعمار کے 130 سالہ دور کے اثرات اور اس سے جڑی تاریخی ذمہ داریاں بدستور دونوں ممالک کے تعلقات میں تناؤ کی ایک بڑی وجہ بنی ہوئی ہیں۔