افغانستان کے بعض صوبوں میں انٹرنیٹ بحال

افغانستان کے بعض صوبوں میں انٹرنیٹ بحال

افغان شہریوں نے بدھ کے روز اسپوتنیک کو بتایا کہ ہرات، بلخ، ننگرہار، جوزجان، بادغیس، نیمروز، کندهار اور کابل میں فائبر آپٹک انٹرنیٹ اور موبائل نیٹ ورکس دوبارہ فعال ہو گئے ہیں۔

یہ پیش رفت ایسے وقت میں سامنے آئی ہے جب افغانستان میں پیر کی شام سے انٹرنیٹ کی ملک گیر بندش کے باعث بینکاری نظام، ہوابازی کی خدمات، سرحدی تجارت اور بیرونی رابطے شدید متاثر ہوئے تھے۔

طالبان کے ترجمان ذبیح اللہ مجاہد نے سوشل میڈیا پلیٹ فارم ایکس پر ان خبروں کی تردید کی کہ طالبان نے ملک بھر میں انٹرنیٹ پر پابندی لگائی ہے۔ ان کے مطابق، حالیہ تعطل فائبر آپٹک کیبلز کے پرانے اور خراب ہونے کے باعث پیدا ہوا، جن کی مرمت اور تبدیلی کا کام جاری ہے۔

اس سے قبل بعض میڈیا رپورٹس میں دعویٰ کیا گیا تھا کہ طالبان کے سربراہ ہیبت اللہ اخوندزادہ نے انٹرنیٹ کو فساد اور غیراخلاقی رویوں کا ذریعہ قرار دیتے ہوئے اس کی بندش کا حکم دیا تھا۔

خیال رہے کہ افغانستان کا انٹرنیٹ بنیادی طور پر قومی فائبر آپٹک نیٹ ورک پر مبنی ہے جس کی لمبائی تقریباً 9 ہزار 350 کلومیٹر ہے اور یہ پچھلے دو دہائیوں میں لاکھوں افغان شہریوں کو دنیا سے جوڑنے کا ذریعہ بنا۔

اقوام متحدہ نے طالبان سے مطالبہ کیا ہے کہ انٹرنیٹ کی بندش کا مسئلہ فوری طور پر حل کیا جائے۔ایک افغان شہری نے ہرات سے بتایا کہ انٹرنیٹ بحالی کے بعد صرافی مراکز، کسٹمز اور ایئرپورٹ نے بھی اپنی سرگرمیاں دوبارہ شروع کر دی ہیں۔