افغانستان میں جنگ ختم ہو چکی ہے؛ طالبان کا اعلان

?️ 16 اگست 2021

سچ خبریں:طالبان کے سیاسی بیورو کے ترجمان نے اتوار کی شام ایک انٹرویو میں دعویٰ کیا کہ افغانستان میں جنگ ختم ہو چکی ہے۔
طالبان کے سیاسی بیورو کے ترجمان محمد نعیم نے اتوار کی شام الجزیرہ چینل کو بتایا کہ ہم تمام افغان شخصیات سے بات کرنے اور انہیں ضروری تحفظ دینے کے لیے تیار ہیں نیز ہم ان کی حفاطت کی ضمانت دیتے ہیں، انہوں نے مزید کہا کہ ہم توقع نہیں کرتے کہ غیر ملکی افواج افغانستان میں اپنے ناکام تجربے کو دہرائیں گی۔

طالبان کے سیاسی بیورو کے ترجمان نے اس بات پر بھی زور دیا کہ یہ گروپ افغان سرزمین کو "کسی کو بھی دوسرے ممالک کو نشانہ بنانے کے لیے استعمال کرنے کی اجازت نہیں دے گا،انھوں نے مزیدکہا کہ یہ گروپ کسی کو نقصان نہیں پہنچانا چاہتا۔

محمد نعیم نے مزید کہاکہ ہم نے وہ حاصل کر لیا جو ہم چاہتے تھے ،ہم اپنے ملک اپنی قوم کی آزادی کے خواہاں تھے، قابل ذکر ہے کہ طالبان نے جیسے ہی افغان دارالحکومت کا کنٹرول سنبھالا ، متعدد بیرونی ممالک نے اپنے سفارت خانے کے عملے کو افغانستان سے واپس بلا لیا۔

واضح رہے کہ غیر ملکی سفارت خانوں اور سفارتی مشنوں کے حوالے سے نعیم نے کہا کہ کابل میں یہ تمام ادارے اور افراد محفوظ ہیں اورہم نے کابل کے تمام لوگوں سے پرسکون رہنے کی اپیل کی ہے،یادرہے کہ امریکہ کے افغانستان سے غیر ذمہ دارانہ انخلا نے اس ملک کو اس حد تک پہنچا دیا ہے کہ آج طالبان نے پورے ملک پر قبضہ کر لیا ہے جبکہ بیس سال قبل امریکہ انھیں طالبان کو ختم کرنے کے لیے اس ملک میں داخل ہوا تھا۔