اسرائیل نے غزہ سے فوجی انخلا کا منصوبہ امریکہ کو دے دیا

اسرائیل نے غزہ سے فوجی انخلا کا منصوبہ امریکہ کو دے دیا

 اسرائیلی میڈیا کے مطابق اسرائیل نے غزہ سے اپنی فوج کی مرحلہ وار واپسی کا ایک منصوبہ امریکی حکومت کے حوالے کر دیا ہے۔ یہ منصوبہ ان مذاکرات کا حصہ ہے جو قیدیوں کی رہائی اور جنگ بندی کے لیے جاری ہیں۔

رپورٹ میں کہا گیا ہے کہ اسرائیلی فوج غزہ کے اندرونی علاقوں سے آہستہ آہستہ پیچھے ہٹے گی، لیکن تین اہم مقامات پر اگلے کئی سال تک موجود رہے گی۔ ان میں غزہ کے ارد گرد حفاظتی علاقہ (بفر زون)،فیلادلفیا روڈ جو مصر کی سرحد کے قریب ہے،تِل المنطار (ہِل 70) جو غزہ شہر کے مشرق میں واقع ایک بلند پہاڑی علاقہ ہے۔

منصوبے کے مطابق،پہلے مرحلے میں اسرائیل قیدیوں کی رہائی کے بعد کچھ علاقوں سے فوج نکالے گا۔دوسرے مرحلے میں، جب غیر ملکی فورسز غزہ میں داخل ہوں گی، کنٹرول بتدریج ایک عربی-بین الاقوامی انتظامیہ کو دیا جائے گا۔آخر میں، اسرائیلی فوج مکمل طور پر غزہ سے نکل جائے گی، مگر سرحد کے گرد حفاظتی باڑ کو مضبوط کیا جائے گا۔

اسرائیلی ذرائع کا کہنا ہے کہ امریکہ یہ طے کرے گا کہ آیا اسرائیل کو ان علاقوں میں موجود رہنے کی ضرورت ہے یا نہیں۔یہ پیش رفت ایسے وقت میں سامنے آئی ہے جب غزہ میں جنگ بندی اور قیدیوں کے تبادلے پر بات چیت جاری ہے۔