اسرائیل ایران سے متعلق امریکی پالیسی کو اپنے مفادات کے لیے استعمال کرنا چاہتا ہے

اسرائیل ایران سے متعلق امریکی پالیسی کو اپنے مفادات کے لیے استعمال کرنا چاہتا ہے

 چین کے ایک ممتاز ماہرِ مشرقِ وسطیٰ نے کہا ہے کہ اسرائیل حالیہ مہینوں میں ایسی سیاسی، سفارتی اور سیکیورٹی سرگرمیوں میں مصروف ہے جن کا مقصد ایران کے حوالے سے امریکا کی پالیسی کو اپنے مفادات کے تابع بنانا اور واشنگٹن کو تصادم کی راہ پر دھکیلنا ہے۔

چینی سرکاری ٹیلی ویژن کو دیے گئے انٹرویو میں ڈونگ مانیوان نے کہا کہ تل ابیب ایران پر دباؤ بڑھا کر امریکا کی خارجہ پالیسی کو ایک طرح کی "اسٹریٹجک یرغمالی پوزیشن” میں لے جانا چاہتا ہے، تاکہ ایران کے ساتھ کسی بھی ممکنہ مکالمے کو ناکام بنایا جا سکے۔

انہوں نے کہا کہ اگر ایران اور امریکا کے درمیان مذاکرات کا آغاز ہوتا ہے تو واشنگٹن بیک وقت تین بنیادی مطالبات سامنے رکھے گا:ایران کا جوہری پروگرام، بیلسٹک میزائل پروگرام، اور خطے میں ایران کے اتحادیوں سے تعلقات۔ ان کے مطابق، جوہری معاملہ اصل محور ہوگا جبکہ میزائل اور علاقائی امور سیاسی دباؤ کے آلات کے طور پر استعمال کیے جائیں گے۔

ڈونگ مانیوان کا کہنا تھا کہ ایران کے نقطۂ نظر سے جوہری مسئلہ مذاکرات میں بڑی رکاوٹ نہیں، کیونکہ تہران بارہا اپنے پروگرام کے پرامن ہونے پر زور دے چکا ہے، تاہم میزائل صلاحیت اور علاقائی کردار کے معاملے پر موجودہ حالات میں ایران اور امریکا کے درمیان کسی سمجھوتے کی گنجائش موجود نہیں۔

انہوں نے اسرائیل کے کردار پر روشنی ڈالتے ہوئے کہا کہ حالیہ عرصے میں تل ابیب نے سیاسی، سفارتی اور حتیٰ کہ فوجی سطح پر ایسی کارروائیاں کی ہیں جن کا مقصد امریکا کی مشرقِ وسطیٰ پالیسی کو اسرائیلی سیکیورٹی مفادات کے مطابق ڈھالنا ہے۔

چینی ماہر کے مطابق، امریکا کی روایتی سرخ لکیر ہمیشہ ایران کا جوہری ہتھیار حاصل کرنا رہی ہے، لیکن اسرائیل اب اس مؤقف کو وسعت دے کر ایران کے پورے جوہری پروگرام کو مسترد کروانا چاہتا ہے، جو ایران کے پرامن جوہری توانائی کے حق کو نشانہ بناتا ہے۔

ڈونگ مانیوان نے خبردار کیا کہ اگرچہ امریکا اس وقت مذاکراتی راستے پر زور دے رہا ہے، لیکن اسرائیلی دباؤ میں اضافہ ایسے اشتعال انگیز اقدامات کا خطرہ بڑھا سکتا ہے جن کے نتیجے میں امریکا کو براہِ راست ایران کے ساتھ تصادم میں دھکیلا جا سکتا ہے۔