اسرائیلی کنیسٹ نے مغربی کنارے میں توسیع پسندانہ منصوبے کو منظوری دے دی

اسرائیلی کنیسٹ نے مغربی کنارے میں توسیع پسندانہ منصوبے کو منظوری دے دی

صہیونی پارلیمان کنیسٹ نے ایک متنازعہ بل کی منظوری دے دی ہے، جس کے تحت اسرائیل اپنی خودساختہ حاکمیت کو مغربی کنارے (غرب اردن) اور وادی اردن تک توسیع دے گا۔

رپورٹس کے مطابق، یہ بل اسرائیلی حکومت کے حکومتی اتحاد کی جانب سے پیش کیا گیا تھا اور اس کے حق میں 71 اراکین کنیسٹ نے ووٹ دیا۔ یہ اقدام اسرائیل کی فلسطینی علاقوں پر تسلط قائم کرنے کی پالیسی کا حصہ سمجھا جا رہا ہے، خاص طور پر ایسے وقت میں جب اسرائیلی فوج کی جارحیت غزہ میں شدت اختیار کر چکی ہے۔

اسرائیلی وزیر توانائی ایلی کوہن نے سماجی رابطے کی ویب سائٹ "ایکس” (سابقہ ٹوئٹر) پر اس اقدام کی حمایت کرتے ہوئے کہا:میں اس تاریخی بل کی حمایت کرتا ہوں جو کنیسٹ میں ہماری حاکمیت کو غرب اردن تک وسعت دینے کے لیے پیش کیا گیا ہے۔ اب وقت آ گیا ہے کہ ہم غرب اردن پر اپنا کنٹرول قائم کریں۔

یاد رہے کہ صہیونی حکومت سابق امریکی صدر ڈونلڈ ٹرمپ کی بھرپور حمایت کے سائے میں مغربی کنارے کے فلسطینی علاقوں پر مکمل کنٹرول حاصل کرنے کی کوشش کر رہی ہے، جب کہ ان کوششوں کے ساتھ ساتھ وہاں اسرائیلی فوج کی پرتشدد کارروائیاں بھی مسلسل جاری ہیں۔