اسرائیلی دباؤ کو کبھی قبول نہیں کریں گے:صمود فلوٹیلا کے ترجمان

اسرائیلی دباؤ کو کبھی قبول نہیں کریں گے:صمود فلوٹیلا کے ترجمان

عالمی کاروان صمود فلوٹیلا کے ترجمان نے کہا ہے کہ انسانی حقوق کے کارکن اسرائیلی حکام کی جانب سے پیش کی جانے والی کسی بھی دستاویز یا معاہدے پر دستخط نہیں کریں گے اور غزہ کی جانب سفر اس وقت تک جاری رہے گا جب تک محاصرہ مکمل طور پر ختم نہ ہو جائے۔

قطر کے الجزیرہ ٹی وی کے مطابق، ترجمان نے بتایا کہ کاروان کے شرکاء اسرائیلی دباؤ کو مسترد کرتے ہیں اور کسی بھی زبردستی مسلط کردہ شرط کو قبول نہیں کریں گے۔

انہوں نے کہا کہ اسرائیلی فورسز نے بین الاقوامی پانیوں میں کئی سرگرم کارکنوں کو غیر قانونی طور پر گرفتار کیا ہے، جبکہ عالمی قوانین کے مطابق ان جہازوں کی نقل و حرکت مکمل طور پر جائز اور قانونی ہے۔

ترجمان نے مزید کہا کہ ہم اسرائیل کے اس دعوے پر یقین نہیں کریں گے کہ وہ انسانی امداد کو غزہ پہنچنے دیتا ہے، کیونکہ بارہا یہ ثابت ہو چکا ہے کہ محاصرے کے باعث اصل رکاوٹ خود اسرائیل ہی ہے۔

انہوں نے زور دے کر کہا کہ کاروان کی کوششیں غزہ کے ساحل تک پہنچنے تک جاری رہیں گی اور یہ جدوجہد صرف اسی وقت ختم ہوگی جب اسرائیل کا غیر انسانی محاصرہ مکمل طور پر ہٹا دیا جائے گا۔