کراچی آرٹس کونسل کا 38 روزہ ورلڈ کلچر فیسٹیول منعقد کرنے کا اعلان

?️ 28 اگست 2025

کراچی: (سچ خبریں) کراچی آرٹس کونسل آف پاکستان نے رواں سال بھی 38 روزہ ورلڈ کلچر فیسٹیول منعقد کرنے کا اعلان کردیا۔

ڈان اخبار میں شائع رپورٹ کے مطابق آرٹس کونسل کے صدر احمد شاہ نے پریس کانفرنس کے دوران بتایا کہ ورلڈ کلچر فیسٹول 2025 کا آغاز 30 اکتوبر سے ہوگا جو 7 دسمبر تک جاری رہے گا۔

انہوں نے بتایا کہ فیسٹیول میں دنیا بھر کے 102 ممالک سے تعلق رکھنے والے 800 سے زائد فنکار شرکت کریں گے۔

ان کے مطابق فیسٹیول چار مہینے قبل ہونا تھا لیکن پاکستان اور بھارت کے درمیان کشیدگی، یوم آزادی کی تقریبات اور مون سون بارشوں کی وجہ سے اس میں تاخیر ہوئی۔

تفصیلات دیتے ہوئے محمد احمد شاہ نے بتایا کہ گزشتہ سال یہ پروگرام 38 روز تک چلا اور 44 ممالک کے فنکاروں کو پاکستان لایا گیا، اسی طرز پر اس سال 102 ممالک سے دنیا کے ہر خطے سے فنکاروں کو مدعو کیا جا رہا ہے۔

انہوں نے کہا کہ فیسٹیول 30 اکتوبر سے شروع ہوگا، جس میں 31 افریقی، 30 ایشیائی، 26 یورپی اور باقی ممالک کے فنکار شرکت کریں گے، یہ ایک تاریخی تقریب ہوگی۔

گزشتہ سال کے بارے میں انہوں نے کہا کہ یہ ملک کی 78 سالہ تاریخ کا سب سے بڑا ثقافتی میلہ تھا، جس کے لیے سندھ حکومت نے تعاون کیا۔

محمد احم شاہ نے بتایا کہ اس بار 20 ممالک کے مصور اور مجسمہ ساز اپنی صلاحیتوں کا مظاہرہ کریں گے جبکہ فلموں، موسیقی، تھیٹر اور رقص کو بھی پروگرام میں شامل کیا گیا ہے۔

فیسٹیول میں بھارت کے فنکاروں کی شرکت کے سوال پر محمد احمد شاہ نے کہا کہ آرٹس کونسل کا ارادہ تھا کہ بھارتی فنکاروں کو مدعو کیا جائے، اس وقت تک بھارت نے پاکستان پر حملہ نہیں کیا تھا۔

انہوں نے امید ظاہر کی کہ ایک وقت آئے گا جب بھارت کے فنکار یہاں پرفارم کریں گے لیکن اس کے لیے بھارتی حکومت کو سبق سیکھنا ہوگا۔

انہوں نے کہا کہ فیسٹیول کے برانڈ ایمبیسڈر کے طور پر نامزد استاد راحت فتح علی خان نے عالمی سطح پر اپنی صلاحیتوں کا لوہا منوایا ہے، اس لیے وہ اس تقریب سے وابستہ ہونے کے مستحق ہیں، وہ تہوار کے آخری دن یعنی 7 دسمبر کو پرفارم کریں گے۔

اس موقع پر راحت فتح علی خان نے کہا کہ وہ اس فیسٹیول کا حصہ بننے کو اپنی خوش قسمتی سمجھتے ہیں اور اس کے لیے سندھ حکومت اور آرٹس کونسل کا شکریہ ادا کرتے ہیں۔