پیارے افضل اور نوری نتھ کے کرداروں کو برے کام کی سزا ملی، حمزہ علی عباسی

?️ 4 مارچ 2025

کراچی: (سچ خبریں) معروف اداکار حمزہ علی عباسی نے کہا ہے کہ ان کے معروف کردار ’پیارے افضل‘ اور ’نوری نتھ‘ کو اپنے برے کاموں کی سزا ملی اور اسی وجہ سے ہی انہوں نے دونوں کردار ادا کیے۔

حمزہ علی عباسی نے حال ہی میں ایک پوڈکاسٹ میں شرکت کی، جہاں انہوں نے کیریئر سمیت روحانی تعلیم پر بھی کھل کر بات کی۔

پوڈکاسٹ کے دوران جب ان سے ولن کے کرداروں سے متعلق سوال کیا گیا تو انہوں نے بتایا کہ عمومی طور پر وہ ایسے ولن کے کردار ادا کرتے ہیں جن میں اختتام پر کرداروں کو سزا ملتی ہو۔

انہوں نے کرداروں اور اداکاری پر بات کرتے ہوئے کہا کہ وہ کرداروں میں ڈوب نہیں جاتے، وہ ان اداکاروں میں شامل نہیں، جو شوٹنگ ختم ہونے کے بعد بھی کرداروں میں ڈوبے رہیں۔

انہوں نے اعتراف کیا کہ وہ کرداروں کی زیادہ گہرائی میں نہیں جاتے، کیوں کہ انہیں لگتا ہے کہ اگر وہ گہرائی میں چلے گئے تو ان سے اداکاری نہیں ہو پائے گی۔

حمزہ علی عباسی کا کہنا تھا کہ وہ بہت زیادہ تیاری کیے بغیر اداکاری کرنے کو ترجیح دیتے ہیں اور یہی ان کی کامیابی ہے۔

اسی حوالے سے بات کرتے ہوئے انہوں نے بھارتی اداکار نواز الدین صدیقی کی تعریفیں کیں اور کہا کہ وہ چار ماہ قبل اگر کردار ادا کرنے کی تیاری شروع کرتے ہیں تو اسی وجہ سے ان کی اداکاری بھی شاندار ہے اور یہ کہ وہ نوازالدین صدیقی جیسے اداکار نہیں۔

ان کے مطابق ان کی کوشش ہوتی ہے کہ اشتہارات میں بھی وہ دوسروں کی ہدایات کے بغیر اپنے نیچرل انداز میں کام کریں، کیوں کہ جب وہ مکمل تیار کرتے ہیں تو ان سے اچھا کام نہیں ہوپاتا۔

حمزہ علی عباسی نے بات کرتے ہوئے یہ اعتراف بھی کیا کہ ’پیارے افضل‘ میں کام کرنے کے بعد ہی وہ شہرت کی نئی بلندیوں پر پہنچے۔

ان کا کہنا تھا کہ ان کے ’پیارے افضل‘ اور ’نوری نتھ‘ کے کرداروں کو اپنے گناہوں کی سزا ملی، دونوں نے غلط کیا اور اختتام پر انہیں غلط کام کی سزا ملی۔

انہوں نے بتایا کہ پیار افضل اور نوری نتھ نے گناہ اور جرائم کیے تھے، دونوں نے ناحق قتل کردیے تھے، جس کی انہیں سزا بھی ملی۔

حمزہ علی عباسی کے مطابق مذکورہ دونوں کرداروں کی اچھی بات یہ تھی کہ دونوں کو ان کے ناحق قتل کرنے کی سزا ملی اور ان کا انجام بھی وہی ہوا جو برے کام کرنے والے کا ہوتا ہے۔