مومنہ اقبال کا سینیئر اداکارہ پر نظر انداز کرنے کا الزام

?️ 3 دسمبر 2024

کراچی: (سچ خبریں) مقبول اداکارہ مومنہ اقبال نے انکشاف کیا ہے کہ انہیں ایک سینیئر اداکارہ نظر انداز کیا جب کہ وہ مذکورہ اداکارہ کے احترام میں اٹھ کھڑی ہوئی تھیں۔

مومنہ اقبال نے حال ہی میں ’ہنسنا منع ہے‘ میں شرکت کی، جہاں انہوں نے مختلف معاملات پر کھل کر بات کی۔

اداکارہ نے دوستوں کے قصے سناتے ہوئے انکشاف کیا کہ ان کے دوست ہمیشہ ان کے ساتھ ایسے مذاق کرتے ہیں، جس وجہ سے انہیں شرمندگی کا سامنا کرنا پڑتا ہے۔

انہوں نے بتایا کہ ایک بار ہوٹل میں سالگرہ منانے کے بعد دوستوں نے ان کے پرس میں پلیٹ، چمچے اور چاقو رکھ دیے اور پھر ہوٹل والوں کو بتا دیا۔

ان کے مطابق جب وہ تمام لوگ اٹھ کر وہاں سے چلنے لگے تو ہوٹل کے اسٹاف نے انہیں روکا اور ان سے ان کے پرس کی تلاشی لینے کا کہا، جس پر انہیں نہ صرف غصہ آیا بلکہ انہیں عجیب بھی لگا۔

مومنہ اقبال نے بتایا کہ انہوں نے ہوٹل کے اسٹاف پر غصہ کرتے ہوئے انہیں بتایا کہ وہ انہیں جانتے نہیں کہ وہ کون ہیں؟

اداکارہ کا کہنا تھا کہ ان کے غصے پر ہوٹل اسٹاف نے کہا آپ جو بھی ہیں لیکن آپ کا ہم پرس چیک کریں گے۔

اداکارہ کے مطابق ہوٹل اسٹاف کی جانب سے تلاشی لیے جانے کے بعد ان کے پرس سے پلیٹ، چاقو اور چمچے نکلے، جس پر انہیں شرمندگی ہوئی اور وہ خاموش ہوگئیں۔

ایک اور سوال کے جواب میں انہوں نے بتایا کہ مختلف شوٹنگز کے دوران ان کے ساتھ کچھ ایسے واقعات ہوئے کہ انہیں لگا کہ وہاں کوئی ان دیکھی مخلوق موجود ہے۔

مومنہ اقبال کے مطابق ایک بار نماز پڑھنے کے دوران انہیں محسوس ہوا کہ ان کے پیچھے جو کرسی پڑی ہے، اس پر کوئی بیٹھا ہوا ہے، اس لیے انہوں نے ڈر کے مارے نماز پر توجہ چھوڑ کر آیت الکرسی پڑھنا شروع کی۔

اداکارہ نے بتایا کہ نماز ختم کرنے کے بعد انہوں نے مذکورہ کرسی کو دیکھا تو وہ خالی تھی۔

ایک اور سوال کے جواب میں اداکارہ نے انکشاف کیا کیریئر کے آغاز میں ایک سینیئر اداکارہ نے انہیں نظر انداز کیا، جس پر انہیں افسوس بھی ہوا۔

مومنہ اقبال نے اداکارہ کا نام لیے بغیر بتایا کہ ایک ڈرامے کی شوٹنگ کے دوران جب انہوں نے سینیئر اداکارہ کو آتے ہوئے دیکھا تو وہ ان کے احترام میں اٹھ کھڑی ہوئیں اور انہیں جاکر سلام بھی کیا۔

اداکارہ کے مطابق سینیئر اداکارہ نے انہیں نظر انداز کیا اور ان سے ملے بغیر یا سلام کیے بغیر جاکر بیٹھ گئیں۔

مومنہ اقبال کا کہنا تھا کہ بیٹھنے کے بعد بھی انہوں نے سینیئر اداکارہ کو جاکر سلام کیا اور پھر اپنے کام میں لگ گئیں۔

انہوں نے کہا کہ وہ مذکورہ اداکارہ کا نام نہیں لینا چاہتیں، وہ کافی سینیئر اور عزت دار اداکارہ ہیں لیکن ان کے رویے پر انہیں اس وقت افسوس ہوا تھا۔