شادی کے ایک ماہ کے اندر ہی نیلم منیر کی کام پر واپسی

?️ 28 جنوری 2025

کراچی: (سچ خبریں) مقبول اداکارہ نیلم منیر نے شادی کے پہلے ہی مہینے کام پر واپسی کرتے ہوئے نئی زندگی شروع کرنے پر نیک خواہشات کا اظہار کرنے والوں کا شکریہ ادا کردیا۔

اداکارہ نے 27 جنوری کو انسٹاگرام پر اپنی تصویر شیئر کرتے ہوئے کام پر واپسی کا اعلان کیا اور ساتھ ہی بتایا کہ وہ پہلے سے زیادہ انرجی اور مثبت توانائی کے ساتھ واپسی کر رہی ہیں۔

اداکارہ نے شادی پر نیک خواہشات کرنے والے تمام مداحوں، دوستوں، سوشل میڈیا پیجز اور بلاگرز کا شکریہ بھی ادا کیا۔

نیلم منیر نے ساتھ دینے اور محبتیں دینے پر تمام بلاگرز اور سوشل میڈیا پیجز کا شکریہ ادا کرتے ہوئے لکھا کہ وہ تمام افراد کی بے حد عزت کرتی ہیں اور ان کے لیے ان کے دل میں پیار بھی ہے۔

اداکارہ کی جانب سے شیئر کردہ تصویر میں میک اپ آرٹسٹ ان کے بالوں کو سنوارتے دکھائی دیے۔

نیلم منیر نے واضح نہیں کیا کہ شادی کے بعد وہ کس ڈرامے یا اشتہار کی شوٹنگ میں مصروف ہیں، تاہم انہوں نے کام پر واپسی کی تصدیق کی۔

نیلم منیر نے رواں ماہ 3 جنوری کو نکاح کی تصاویر شیئر کرتے ہوئے نئی زندگی شروع کرنے کی تصدیق کی تھی۔

بعد ازاں اداکارہ نے متحدہ عرب امارات (یو اے ای) کی ریاست دبئی میں شوہر کے ہمراہ کرائے گئے فوٹوشوٹ کی تصاویر اور ویڈیوز بھی شیئر کیں۔

نیلم منیر نے اگرچہ شوہر کے ہمراہ تصاویر اور ویڈیوز شیئر کیں، تاہم انہوں نے شوہر سے متعلق خود میڈیا کو کوئی معلومات فراہم نہیں کی۔

متعدد شوبز ویب سائٹس، اداکاروں اور یوٹیوبرز کے مطابق نیلم منیر نے پنجاب کے شہری محمد راشد سے شادی کی ہے جو کہ دبئی میں اپنا کاروبار کرتے ہیں۔

اداکارہ کی شادی کے بعد ان کے دیور ہونے کا دعویٰ کرنے والے شخص بھی سامنے آئے تھے، جنہوں نے بتایا تھا کہ ان کے بھائی سے اداکارہ کے ڈھائی سال سے تعلقات تھے۔