شادی کے اگلے لمحے احساس ہوا کہ غلط فیصلہ کرلیا، مایا خان

?️ 13 ستمبر 2024

کراچی: (سچ خبریں) ٹی وی میزبان و اداکارہ مایا خان نے اعتراف کیا ہے کہ شادی کے اگلے لمحے ہی انہیں احساس ہوچکا تھا کہ انہوں نے غلط فیصلہ کرلیا لیکن اس باوجود انہوں نے تعلق میں چار سال گزارے۔

مایا خان نے حال ہی میں 365 نیوز کے پوڈکاسٹ میں شرکت کی، جہاں انہوں نے ذاتی زندگی سمیت مختلف معاملات پر کھل کر بات کی۔

انہوں نے اعتراف کیا کہ کیریئر اور زندگی میں انہوں نے بہت ساری غلطیاں کیں اور ان سے ہی سیکھ کر وہ مضبوط بنیں۔

ان کے مطابق شادی کے بعد تشدد اور دیگر مسائل کی وجہ سے وہ شدید ڈپریشن کا شکار بھی رہیں اور انہوں نے انزائٹی میں مشکل وقت بھی دیکھا۔

ان کا کہنا تھا کہ بہتر ذہنی صحت ہر کسی کا حق ہے لیکن افسوس سماج میں ڈپریشن اور انزائٹی کو مسئلہ ہی نہیں سمجھا جاتا، حالانکہ ڈپریشن ایک بیماری ہے جو کہ کسی کو بھی لگ سکتی ہے۔

مایا خان نے ایک سوال کے جواب میں اعتراف کیا کہ شادی کے بندھن میں بندھنے کے اگلے ہی لمحے انہیں احساس ہوچکا تھا کہ ان سے غلطی ہوگئی۔

اداکارہ کے مطابق رشتے میں بندھنے کے کچھ ہی لمحوں بعد انہیں اپنی غلطی کا احساس ہوچکا تھا لیکن اس باوجود انہوں نے چار سال تک شادی چلائی اور تشدد برداشت کیا۔

انہوں نے کہا کہ شادی کے کچھ وقت بعد ہی اگرچہ غلط چیزیں سامنے آنے لگتی ہیں لیکن اس باوجود ان پر یقین نہیں ہوتا، کیوں کہ ہمیں امید ہوتی ہے کہ سب کچھ بہتر ہوگا، تاہم چیزیں بہتر نہیں ہوتیں۔

اگرچہ مایا خان نے بتایا کہ انہیں شادی کے اگلے لمحے کی ہی غلطی کا احساس ہوگیا تھا، تاہم انہوں نے شوہر کے تشدد اور شادی شدہ زندگی پر کھل کر بات نہیں کی۔

اس سے قبل وہ انٹرویوز میں بتا چکی ہیں کہ 2011 میں ان کا نکاح ہوگیا تھا لیکن بدقسمتی سے جس شخص کے ساتھ ان کا نکاح ہوا، ان سے شادی نہیں ہوسکی تھی اور انہوں نے دوسرے شخص سے شادی کرلی تھی جو کہ کچھ ہی عرصے بعد طلاق پر ختم ہوئی تھی۔

وہ پہلے بھی اعتراف کر چکی ہیں کہ ان کا شادی کرنے کا فیصلہ غلط تھا۔

وہ بتا چکی ہیں کہ جس شخص سے انہوں نے شادی کی، انہوں نے انہیں بدترین جسمانی تشدد کا نشانہ بنایا، ان کی تضحیک کی، جس وجہ سے ان کی شادی طلاق پر ختم ہوئی۔