بلاک بسٹر ڈراما ’ہمسفر‘ کو 2 بار منع کرچکا تھا، فواد خان کا تقریباً 10 سال بعد انکشاف

?️ 7 جنوری 2024

کراچی: (سچ خبریں) ٹیلی ویژن سے اپنے کیریئر کا آغاز کرنے والے نامور اداکار فواد خان نے انکشاف کیا ہے کہ وہ بلاک بسٹر ڈراما سیریل ’ہمسفر‘ کو 2 بار منع کرچکے تھے، اگر انہیں دوبارہ اس ڈرامے میں کام کرنے کا کہا جائے تو وہ منع کردیں گے۔

یہ انکشاف اداکار نے احمد علی بٹ کے پوڈکاسٹ میں کیا جس کے انٹرویو کے ویڈیو کلپ سوشل میڈیا پر گردش کررہی ہے۔

ماضی کا مقبول ڈراما سیریل ’ہمسفر‘ 2011 میں نشر ہوا تھا، ڈرامے کی کہانی نامور رائٹر فرحت اشتیاق کے ناول پر مبنی ہے اور اسے سرمد کھوسٹ کی ہدایت کاری پر بنایا گیا تھا۔

ڈرامے میں فواد خان نے ’اشعر حسین‘ اور ماہرہ خان نے ’خراد‘ کا مرکزی کردار ادا کیا تھا، رومانوی کہانی پر مبنی ڈراما سیریل نے پاکستان میں ہی نہیں بلکہ بھارت اور بنگلہ دیش سمیت دیگر ممالک میں بھی کافی پذیرائی سمیٹی تھی۔

اس کے بعد ماہرہ خان اور فواد خان کی آن اسکرین جوڑی کو بے حد پسند کیا جانے لگا تھا۔

تاہم ڈراما نشر ہونے کے تقریباً 10 سال بعد فواد خان نے انکشاف کیا ہے کہ وہ یہ ڈراما نہیں کرنا چاہتے تھے، انہوں نے اس ڈرامے کو دو بار انکار کیا تھا اور اگر انہیں دوبارہ یہ ڈراما کرنے کا موقع ملے تو وہ انکار کردیں گے۔

فواد خان نے کہا کہ یہ ڈراما کرنے کی وجہ صرف پیسا (paycheck) تھا، انہیں اس کہانی نے متاثر نہیں کیا اور نہ ہی یہ کوئی منفرد کہانی تھی کیونکہ اس جیسی دیگر کہانیوں پر بھی ڈرامے بن رہے تھے۔

اداکار نے کہا کہ ڈرامے کی مقبولیت صرف اس کی کاسٹ تھی، انہوں نے تسلیم کیا کہ ڈراما ہمسفر نے ان کے کیریئر میں اہم کردار ادا کیا ہے لیکن اس کی کہانی نہ منفرد تھی اور وہ اس سے متاثر ہوئے تھے۔

فواد خان نے کہا کہ اس ڈرامے کی مقبولیت کی ایک اور وجہ اس کا گانا تھا جسے وقار علی نے تحریر کیا اور گلوکارہ قرۃالعین بلوچ نے اپنی آواز میں گنگنایا تھا۔