یاسین ملک موت و زندگی کی کشمکش میں ہیں، خاموشی جرم ہوگی۔ مشعال ملک

?️ 11 اکتوبر 2025

اسلام آباد (سچ خبریں) حریت رہنما یاسین ملک کی اہلیہ مشعال ملک نے کہا ہے کہ ان کے شوہر جیل میں موت و زندگی کی کشمکش میں ہیں اور انہیں طبی سہولیات سے محروم رکھا جا رہا ہے۔

مشعال ملک نے ایک وڈیو پیغام میں عالمی ضمیر کو جھنجھوڑتے ہوئے کہا ہے کہ یاسین ملک کے دل کا پرانا وال ناکارہ ہو چکا ہے اور وہ فوری آئی سی یو علاج کے منتظر ہیں مگر بھارتی حکام انہیں علاج کی سہولت نہیں دے رہے۔

ان کے مطابق یاسین ملک کے میٹلک ہارٹ والو جو 1990 میں لگایا گیا تھا اب مکمل طور پر ناکارہ ہو چکا ہے، خوراک میں زہر ملانے کی اطلاعات ہیں اور سب کچھ اس جانب اشارہ کر رہا ہے کہ اگر دنیا نے خاموشی اختیار کی تو بہت دیر ہو جائے گی۔

مشعال ملک کا کہنا تھا کہ یہ صرف ایک شخص کی نہیں بلکہ انسانیت اور انصاف کی جنگ ہے، عالمی ادارے، انسانی حقوق کے علمبرداراور میڈیکل تنظیمیں یاسین ملک کے فوری علاج کے لیے کردار ادا کریں۔

انہوں نے خبردار کیا کہ اگر یاسین ملک کو کچھ ہوا تو پورا خطہ عدم استحکام کی لپیٹ میں آ سکتا ہے، کشمیر، پاکستان اور دنیا بھر میں احتجاج اور دعاؤں کا سلسلہ جاری ہے لیکن وقت کم اور عمل فوری درکار ہے۔