کورونا کا قہرجاری، 4 ہزار سے زائد کیسز، 57 ہلاکتوں کی تصدیق

?️ 28 مارچ 2021

اسلام آباد(سچ خبریں) پاکستان میں کورونا وائرس کی تیسری لہر کے دوران کیسز بڑھنے کا سلسلہ جاری ہے، گزشتہ 24 گھنٹوں کے دوران کووڈ۔19 کے 45 ہزار 656 ٹیسٹ کیے گئے جس کے نتیجے میں 4 ہزار 767 افراد میں وائرس کی تصدیق ہوئی جس کے بعد متاثرہ افراد کی مجموعی تعداد 6 لاکھ 54 ہزار 591 ہو گئی ہے جبکہ فعال کیسز کی تعداد 44 ہزار 447 ہو گئی ہے۔

کووڈ 19 کے اعدادوشمار کے لیے بنائی گئی نیشنل کمانڈ اینڈ آپریشن سینٹر (این سی او سی) کی ویب سائٹ کے مطابق گزشتہ 24 گھنٹے کے دوران ملک میں 4 ہزار 767 نئے کیسز رپورٹ ہوئے جبکہ مزید 57 افراد ہلاک ہو گئے۔

ذرائع کی جانب سے مرتب کیے گئے اعداد وشمار کے مطابق یہ جون 2020 کے بعد ایک دن میں رپورٹ ہونے والے کیسز کی سب سے بڑی تعداد ہے جب ایک ہی دن میں 4 ہزار 916 کیسز رپورٹ ہوئے تھے۔

ملک میں مزید 57 افراد جان کی بازی ہار گئے جن میں سے 20 اموات وینٹیلیٹرز پر موجود مریضوں کی تھیں جس کے بعد مرنے والوں کی مجموعی تعداد 14 ہزار 215 ہو گئی ہے۔ملک میں مزید 2 ہزار 647 افراد صحتیاب بھی ہوئے جس کے بعد وائرس سے صحتیاب ہونے والوں کی مجموعی تعداد 5 لاکھ 95 ہزار 929 ہو گئی ہے البتہ اب بھی 3 ہزار 43 مریضوں کی حالت نازک ہے۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد سے ملک میں وبا کے پھیلاؤ میں اتار چڑھاؤ جاری ہے اور اب تک بیماری کی 2 لہریں دیکھی جاچکی ہیں۔

دریں اثنا ملک میں وائرس کی تیسری لہر کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن نافذ کردیا گیا ہے جبکہ کاروباری سرگرمیوں کے اوقات کار بھی محدود کردیے گئے ہیں اس کے علاوہ زیادہ متاثرہ علاقوں میں تعلیمی ادارے بھی بند ہیں۔