کالعدم تنظیم تحریک لبیک نے حکومت سے مدد مانگی

?️ 29 اپریل 2021

اسلام آباد(سچ خبریں) تحریک لبیک پاکستان (ٹی ایل پی) نے کالعدم قرار دیئے جانے کے بعد حکومت سے اپیل کی ہے کہ وہ اپنے اس فیصلے پر نظر ثانی کرے اور اس تحریک کو کالعدم قرار دئے جانے والے فیصلے کو بدل دے اس سلسلے میں انہوں نے حکومت سے اپیل کی ہے

ٹی ایل پی نے سیکرٹری داخلہ کے پاس دائر کردہ اپیل میں موقف اختیار کیا کہ تحریک لبیک پاکستان الیکشن کمیشن میں رجسٹرڈ سیاسی جماعت ہے جس کا دہشت گردی سے کوئی تعلق نہیں، اس پر عائد کردہ پابندی بلاجواز ہے جسے ختم کیا جائے۔ سیکرٹری داخلہ کی سربراہی میں ٹی ایل پی کی اپیل کا جائزہ لینے کے لیے اجلاس کل طلب کرلیا گیا۔

توہین رسالت پر فرانسیسی سفیر کو ملک بدر کرنے کے مطالبے پر احتجاجی مظاہروں کے بعد رواں ماہ وزارت داخلہ نے وفاقی کابینہ کی منظوری کے بعد انسداد دہشتگردی ایکٹ 1997 کے تحت تحریک لبیک پاکستان کو کالعدم قرار دیا تھا۔

وزارت داخلہ کی جانب سے بھیجی گئی سرکلر سمری وزیراعظم اور وفاقی کابینہ نے بھی منظور کرلی تھی۔ ٹی ایل پی کو انسداد دہشت گردی ایکٹ کے تحت کالعدم قرار دیا گیا ہے۔