پی ٹی آئی کا سائفر کیس میں عمران خان کی سزا کا فیصلہ ہائیکورٹ میں چیلنج کرنے کا اعلان

?️ 30 جنوری 2024

اسلام آباد: (سچ خبریں) پاکستان تحریک انصاف (پی ٹی آئی) نے سائفر کیس میں بانی پی ٹی آئی عمران خان، شاہ محمود قریشی کی 10، 10 سال قید با مشقت کی سزا سے متعلق فیصلے کو ہائیکورٹ میں چیلنج کرنے کا اعلان کردیا۔

تحریک انصاف کی جانب سے جاری بیان میں کہا گیا کہ ہمیشہ قانون کی حکمرانی کے اصول کی پاسداری کی، اپنی قانونی جنگ جاری رکھیں گے۔

بیان میں کہا گیا کہ فیصلے کو اعلی عدالت میں چیلنج کیا جائے گا، امید ہے کہ یہ سزا معطل ہو جائے گی کیونکہ اسلام آباد ہائی کورٹ اس سے پہلے بھی مرتبہ اس کیس کی پروسیڈنگ کو کالعدم قرار دے چکی ہے۔

پی ٹی آئی نے اپنے کارکنوں سے پر سکون رہنے کی اپیل کرتے ہوئے کہا کہ کارکن ایساکام نہ کریں جس سے پرامن جدوجہد کو نقصان پہنچے، ہمیں اپنی توانائیوں کو 8 فروری کوبروئےکار لانا چاہیے۔

بیان میں مزید کہا گیا کہ یقینی بناناہےکہ پی ٹی آئی امیدوار بھاری اکثریت سے اسمبلیوں میں واپس آئیں۔

دوسری جانب تحریک انصاف کے سیکریٹری جنرل عمر ایوب نے پارٹی ورکرز کو احتجاج سے روکتے ہوئے کہا کہ ساری توجہ 8 فروری کو ہونے والے انتخابات پر مرکوز رکھیں اور بڑی تعداد میں باہر نکل کر ووٹ ڈالیں تاکہ ٹرن آوٹ زیادہ سے زیادہ ہو۔

واضح رہے کہ آج سائفر کیس میں عمران خان اور شاہ محمود قریشی کو دس، دس سال قید با مشقت کی سزا سنا دی گئی۔

آفیشل سیکرٹ ایکٹ کے تحت بننے والی عدالت کے جج ابو الحسنات محمد ذولقرنین نے ملزمان کی موجودگی میں مختصر فیصلہ جاری کرتے ہوئے سزا سنائی تھی۔

واضح رہے کہ گزشتہ روز رات گئے تک جاری رہنے والی سماعت کے دوران عمران خان اور شاہ محمود قریشی کے خلاف سائفر کیس میں تمام 25 گواہان کے بیانات پر جرح مکمل لی گئی تھی۔