پنجاب میں تبدیلی کی باتوں میں اب اثر نہیں رہا

🗓️ 18 دسمبر 2021

اسلام آباد (سچ خبریں) سینئر صحافی سہیل وڑائچ کا کہنا ہے کہ پنجاب میں تبدیلی کی باتوں میں اب اثر نہیں رہا ۔وقت کم ہونے کی وجہ سے جب تک پی ٹی آئی کی حکومت ہے پنجاب میں بزدار صاحب موجود رہیں گے۔انہوں نے جیو پاکستان پروگرام میں گفتگو کرتے ہوئے کہا کہ روایتی طور پر خانیوال کا ضمنی الیکشن بہت دلچسپ تھا۔ن لیگ کے جیتنے والے امیدوار عام انتخابات میں پاکستان تحریک انصاف کے امیدوار تھے۔

بحرال نتیجہ روایتی آیا ہے۔دیہی علاقوں میں ن لیگ کی پوزیشن پی ٹی آئی سے بہتر ہے۔پاکستان پیپلز پارٹی بہت کوشش کر رہی ہے اور اب پنجاب میں ہر سیٹ پر میدان میں اتر رہی ہے۔دوسری جانب سینئیر صحافی و تجزیہ کار رانا عظیم نے خانیوال میں پاکستان تحریک انصاف کی شکست پر بات کرتے ہوئے کہا کہ تمام تر کوششوں کے باوجود پی ٹیآ ئی خانیوال میں ہار گئی ہے۔

انہوں نے کہا کہ خانیوال کے ضمنی الیکشن میں پاکستان تحریک انصاف اپنی بھرپور کوشش کر رہی تھی، تمام وسائل بھی استعمال کیے گئے۔ وہاں پر بے انتہا کام بھی کروائے گئے ، لیکن مہنگائی بھی اس الیکشن پر نظر انداز ہو گئی۔ وزیراعظم عمران خان خانیوال کے ضمنی الیکشن میں پی ٹی آئی کی ہار پر سخت برہم ہوئے۔ یاد رہے کہ نجاب کے ضلع خانیوال پی پی 206 میں ضمنی الیکشن میں غیر سرکاری نتائج کے مطابق مسلم لیگ ن کے رانا سلیم سب سے زیادہ ووٹ لے کر کامیاب ہوگئے۔
پولنگ اسٹیشنز کے غیر حتمی اور غیر سرکاری نتیجہ موصول ہوگئے جن کے مطابق مسلم لیگ ن کے رانا محمد سلیم 47 ہزار 985 ووٹ لے کر کامیاب ہوگئے، پی ٹی آئی کے نورین نشاط ڈاہا 33 ہزار 875 ووٹ لے کر دوسرے جبکہ پیپلز پارٹی کے سید واثق 15 ہزار 233 ووٹ لے کر تیسرے نمبر پر آ گئے۔ مسلم لیگ ن کے امیدوار رانا محمد سلیم کی کامیابی پر پارٹی کارکنوں نے جشن منایا، ڈھول کی تھاپ پر بھنگرے ڈالے، مٹھائیاں تقسیم کیں اور شاندار آتشبازی کا مظاہرہ بھی کیا۔